Milioneri dhe influencuesi i njohur amerikan Dan Bilzerian u shfaq në emisionin “Piers Morgan Uncensored,” ku provokoi reagime të shumta për qëndrimet e tij mbi Lindjen e Mesme, judaizmin dhe rolin e Izraelit në konfliktet me palestinezët. Bilzerian e quajti Hamasin “një organizatë rezistence,” dhe ish-udhëheqësin Yahya Sinwar “një hero,” duke hedhur poshtë raportimet për sulmet e supozuara seksuale të kryera nga anëtarët e Hamasit si “të pavërteta.”
Gjatë intervistës, Bilzerian shprehu pakënaqësinë e tij për “statusin e veçantë” që, sipas tij, judaizmi ka në shoqëri dhe tha se e shqetëson çdo fe që e vendos veten më lart se të tjerat.
“Nuk më pëlqen feja që pretendon se ndjekësit e saj janë më të mirë se njerëzit e tjerë. E shohim këtë në Izrael, ku palestinezët trajtohen si qytetarë të dorës së dytë, si disa kafshë,” theksoi Bilzerian.
Ai shtoi se e shqetëson mbështetja e hapur që merr Izraeli, ndërsa myslimanët shpesh përshkruhen në një dritë negative në media.
“Kjo është kthyer në një lloj programi, ku të gjithë i quajnë myslimanët terroristë, ndërsa fshihet roli i Izraelit në aktet e terrorizmit,” deklaroi Bilzerian.
Bilzerian më pas kaloi në temën e judaizmit dhe lidhjes së tij me krishterimin, duke thënë se ishte i tronditur nga ajo që pretendon se mësoi nga Talmudi. Ai tha se judaizmi përmban fyerje ndaj Jezusit dhe Virgjëreshës Mari, çka, sipas tij, tregon se këto dy fe nuk janë të pajtueshme.
“Ata thonë se Jezusi është në ferr dhe po vuan, dhe se Virgjëresha Mari është prostitutë,” deklaroi Bilzerian, duke theksuar se nuk beson në idenë që judaizmi dhe krishterimi “mund të bashkohen.”
Gjatë intervistës, Morgan e pyeti nëse ishte i vetëdijshëm për ndikimin e fjalëve të tij tek publiku, dhe Bilzerian iu përgjigj se e di që reagimet do të jenë negative, por qëndron pas mendimeve të tij.
“Jam i vetëdijshëm që ajo që po them është politikisht jo korrekte, por besoj se është e vërtetë. Ekzistojnë mbi 2 miliardë myslimanë, por në vend që të ndërtojmë tolerancë, propagandohet urrejtja ndaj Islamit,” tha Bilzerian.
Kur Morgan e pyeti direkt se si do t’u përgjigjej reagimeve të shikuesve hebrenj që mund të tronditen nga qëndrimet e tij, Bilzerian u përgjigj se është “i tmerruar” nga ajo që pretendon se ka mësuar për judaizmin.
“Jam i tmerruar që kam zbuluar se ata besojnë se është e pranueshme të vjedhin nga ata që nuk janë hebrenj, që ekzistojnë standarde të dyfishta në drejtësi dhe madje se është në rregull të përdhunohet një i burgosur palestinez,” deklaroi ai, duke shtuar se ndihet “i tmerruar” për faktin se “Amerika mbështet gjenocidin.”
