Danimarka dhe Gjermania do të lidhen me tunelin më të gjatë nënujor në botë për trafikun hekurudhor dhe rrugor, i cili do të jetë i gjatë 18 kilometra. Afati i fundit për përfundimin e ndërtimit të tunelit është viti 2029.
Ndërtimi i tunelit Fehmarnbelt do të kushtojë 10 miliardë euro dhe do të lidhë Rødbyhavn në ishullin danez Lolland dhe Puttgarden në Gjermaninë veriore. Tuneli, i quajtur zyrtarisht Lidhja Fikse Fehmarnbelt, do të ketë një autostradë dhe një hekurudhë të elektrizuar.
Udhëtimi me tren përmes tunelit do të zgjasë shtatë minuta, ndërsa udhëtimi me makinë do të zgjasë 10 minuta. Kjo do të thotë që nuk do t’ju duhet më të vozitni në unazën 160 kilometra të gjatë në kontinent. Kjo do të thotë që udhëtimi me tren nga Hamburgu në Kopenhagë do të zgjasë tre orë, në vend të pesë orëve të mëparshme.
Tuneli do të zëvendësojë gjithashtu trafikun shumë të ngarkuar të trageteve – trageti transporton miliona pasagjerë çdo vit. Kjo do të shkurtojë udhëtimin me një orë. Plani është që të vazhdojnë linjat hekurudhore përmes këtij tuneli drejt Suedisë, Norvegjisë dhe Finlandës.
Ideja për të lidhur Danimarkën dhe Gjermaninë me një tunel si ky nuk është diçka e re. Pas 10 vitesh planifikim, ndërtimi i tij në anën daneze filloi në vitin 2020, ndërsa nga pala gjermane në vitin 2021. Bashkimi Evropian siguroi 1.1 miliardë euro për ndërtimin.
Do të jetë 40 metra nën Detin Baltik dhe do të përbëhet nga 89 pjesë masive betoni që do të ulen në ujë me vinç. Kompania shtetërore daneze Femern A/S, përgjegjëse për këtë projekt, pret që seksioni i parë i tunelit të ndërtohet deri në vitin e ardhshëm.
Disa organizata mjedisore kanë vënë në dyshim ndikimin e tunelit në jetën e egër. Kompania e përmendur siguron se tuneli do të kursejë ndjeshëm kohë, energji dhe do të reduktojë emetimet e dioksidit të karbonit (CO2), transmeton Euronews.
