Dënimi për plagjiaturë, Dugolli deklarohet para senatit të UP-së

Organizata për Rritjen e Cilësisë në Arsim (ORCA), ka shpërndarë të mërkurën një video në Facebook, ku dëgjohet profesori Bujar Dugolli teksa flet para Senatit të Universitetit të Prishtinës në lidhje me vendimin e Këshillit të Etikës, i cili atë dhe Ardian Kastratin i ka shpallur plagjiatorë.

Sipas ORCA-s, në këtë mbledhje të Senatit Dugolli e ka pranuar hapur fajësinë, ndërsa i njëjti dëgjohet duke thënë se “nëse unë kam bërë gabime, që kam pasur besim me ma vendos emrin dhe pa dijeninë time është vendos i pari, në rregull, dënomëni”.

Dugolli është shprehur se gabimi i vetëm i tij për të cilin ndjehet fajtor është se ka pranuar që emri i tij të vendoset në punimin që përmban plagjiaturë. Këtë veprim e ka justifikuar përmes mirëbesimit që e ka pasur në kolegun e tij, Ardian Kastratin dhe se nuk e ka shikuar punën e bërë në punim.

Në anën tjetër, ORCA tha se “pavarësisht këtij deklarimi të hapur para senatorëve dhe menaxhmentit të UP-së, Senati nuk guxoi të merrte vendim meritor, t’i përjashtojë nga universiteti plagjiatorët siç ndodhë në çdo rast të ngjashëm”.

“Gjithsesi, Dugolli duke tentuar ta shfajësojë veten, e inkriminon edhe më shumë atë. Ai pranon haptazi para Senatit të Universitetit të Prishtinës se përmes veprimit të tij ai ka kontrabanduar punime shkencore me qëllim të avancimit, pra duke vendosur emrin në një punë akademike për të cilën nuk ka asnjë pikë kontributi në të”, thuhet në reagimin e tyre. /Telegrafi/

Kategoritë
LajmeVendi