Një nga avokatët më të njohur për të drejtat e njeriut në Britani ka paraqitur një padi për krime lufte kundër 10 britanikëve që kanë shërbyer në ushtrinë izraelite në Gaza.
Michael Mansfield KC është pjesë e një grupi avokatësh që dorëzoi një dosje prej 240 faqesh njësisë për krime lufte të Scotland Yard-it, në të cilën përshkruhet vrasja e qëllimshme e civilëve dhe punëtorëve humanitarë, përfshirë sulme me snajper, si dhe sulme të pa dallim në zona civile, përfshirë spitale.
Raporti, i përgatitur nga një ekip avokatësh dhe studiuesish britanikë në Hagë, gjithashtu akuzon të dyshuarit për sulme të koordinuara ndaj vendeve të mbrojtura, përfshirë monumente historike dhe vende fetare, si dhe zhvendosje të detyruar të civilëve.
Për arsye ligjore, emrat e të dyshuarve, përfshirë ata në pozita zyrtare, dhe i gjithë raporti nuk janë bërë publikë.
Izraeli vazhdimisht mohon se liderët e tij politikë apo ushtria kanë kryer krime lufte gjatë sulmeve në Gaza, ku janë vrarë mbi 50,000 njerëz, shumica civilë.
“Nëse ndonjë prej qytetarëve tanë kryen një shkelje, ne duhet të bëjmë diçka për këtë. Edhe nëse nuk mund të ndalojmë sjelljen e keqe të qeverive të huaja, mund të parandalojmë qytetarët tanë të sillen keq. Qytetarët britanikë kanë një detyrim ligjor për të mos marrë pjesë në krimet e kryera në Palestinë. Askush nuk është mbi ligjin,” tha Mansfield, i njohur për punën e tij në çështje të mëdha si zjarri në Grenfell Tower, rasti i Stephen Lawrence dhe Birmingham Six.
Raporti, i dorëzuar në emër të Qendrës Palestineze për të Drejtat e Njeriut (PCHR) me seli në Gaza dhe Qendrës Ligjore për Interes Publik (PILC) me seli në Britani, mbulon krimet e kryera në periudhën nga tetori 2023 deri në maj 2024 dhe përgatitja e tij zgjati gjashtë muaj.
Secili nga krimet që i atribuohen 10 të dyshuarve, disa prej të cilëve kanë nënshtetësi të dyfishtë, përbën një krim lufte ose krim kundër njerëzimit, thuhet në raport.
Një dëshmitar, që ndodhej në një institucion mjekësor, pa kufoma “të shpërndara në tokë, veçanërisht në oborrin e spitalit, ku shumë trupa ishin varrosur në një varr masiv”. Një buldozer “e shtypi një trup të pajetë në një skenë të tmerrshme dhe zemërthyese, duke i fyer të vdekurit”, tha dëshmitari. Po ashtu u tha se buldozeri rrëzoi një pjesë të spitalit.
Sean Summerfield, avokat në Doughty Street Chambers, i cili ndihmoi në përpilimin e dosjes, tha se ajo bazohet në prova nga burime të hapura dhe dëshmi të dëshmitarëve, të cilat së bashku përbëjnë një rast “bindës”.
“Publiku do të jetë i tronditur, do të thosha, kur të dëgjojë se ka prova të besueshme se britanikët kanë qenë të përfshirë drejtpërdrejt në kryerjen e disa prej këtyre krimeve,” tha ai, duke shtuar se ekipi dëshiron të shohë individë “që të dalin para gjykatës Old Bailey për të dhënë llogari për krimet.”
Në raport thuhet se Britania, sipas marrëveshjeve ndërkombëtare, ka përgjegjësinë për të hetuar dhe ndjekur penalisht ata që kanë kryer “krime të rënda ndërkombëtare”.
Neni 51 i Ligjit për Gjykatën Penale Ndërkombëtare i vitit 2001 thotë se “është shkelje e ligjit të Anglisë dhe Uellsit nëse një person kryen gjenocid, krim kundër njerëzimit apo krim lufte”, edhe nëse ndodh në një vend tjetër.
Raji Sourani, drejtor i PCHR-së, tha: “Kjo është e paligjshme, kjo është çnjerëzore dhe mjaft është. Qeveria nuk mund të thotë se nuk e dinim; ne po u japim të gjitha provat.”
Paul Heron, drejtor ligjor i PILC-së, tha: “Po i dorëzojmë këto raporte për të treguar qartë se këto krime lufte nuk janë kryer në emrin tonë.”
Dhjetëra ekspertë ligjorë dhe të të drejtave të njeriut kanë nënshkruar një letër mbështetëse duke i bërë thirrje njësisë për krime lufte të hetojë ankesat.
