Sinirlioğlu do të shërbejë për një mandat trevjeçar si sekretar i përgjithshëm i OSBE-së. Gjatë mandatit të tij, në agjendë do të jenë shumë çështje thelbësore në lidhje me paqen dhe stabilitetin global
Ish-ambasadori turk Feridun Sinirlioğlu është zgjedhur sekretar i përgjithshëm i Organizatës për Siguri dhe Bashkëpunim në Evropë (OSBE), duke u bërë shtetasi i parë turk që mban këtë post, transmeton Anadolu.
Vendimi u finalizua gjatë takimit të 31-të të Këshillit Ministror të OSBE-së në Maltë, ku mori pjesë edhe ministri i Jashtëm turk Hakan Fidan.
Zgjedhja e Sinirlioğlus mori miratimin e 57 vendeve anëtare të OSBE-së nga Amerika e Veriut, Evropa dhe Azia.
Ai do të shërbejë për një mandat trevjeçar si sekretar i përgjithshëm i OSBE-së. Gjatë mandatit të Sinirlioğlus, në agjendë do të jenë shumë çështje thelbësore në lidhje me paqen dhe stabilitetin global, veçanërisht ruajtja e themeleve të arkitekturës së sigurisë në Evropë.
Gjatë udhëheqjes së tij pritet të adresohen shumë çështje kritike në lidhje me paqen dhe stabilitetin global.
Posti kishte mbetur bosh që nga shtatori për shkak të mosarritjes së konsensusit nga shtetet anëtare për një kandidat. Proceset e vendimmarrjes kanë ngecur për shkak të ndarjeve, veçanërisht pas luftës në Ukrainë.
Duke uruar Sinirlioğlun, Fidan tha se ky vendim është rezultat i “rolit aktiv” të Türkiyes në arenën ndërkombëtare dhe “qasjes së saj të diplomacisë bashkëpunuese”.
“Në këto kohë të vështira, kur bota po testohet nga kriza dhe konflikte të thella, OSBE-ja duhet të luajë një rol të rëndësishëm për paqen, stabilitetin dhe sigurinë”, tha ai.
Sinirlioğlu, një diplomat veteran me më shumë se 40 vjet përvojë, ka mbajtur role të ndryshme kyç, duke përfshirë atë të përfaqësuesit të përhershëm të Türkiyes në OKB (2016–2023).
OSBE-ja, e themeluar në vitin 1975 gjatë Luftës së Ftohtë, kishte për qëllim lehtësimin e dialogut për të ulur tensionet midis bllokut lindor dhe atij perëndimor.
