Rumania tha se kishte gjetur fragmente të dronëve rusë në territorin e saj dhe NATO tha se nuk shihte shenja të një sulmi të qëllimshëm në territorin e aleancës pasi trupat e Moskës gjuajtën 38 dronë me rreze të gjatë veprimi në Ukrainë gjatë natës.
Forcat Ajrore të Ukrainës shkatërruan 25 dronë rusë, tha komandanti i saj në Telegram. Tre drone “u humbën pasi kaluan kufirin shtetëror me Rumaninë,” shtoi ai.
Ministria e Mbrojtjes e Rumanisë tha se kishte gjetur pjesë të një droni rus Geran 1/2 pranë fshatit Plauru përtej lumit Danub nga qyteti jugor i Ukrainës, port i Izmail, i cili u sulmua për të dytën natë me radhë.
Në rrjetet sociale është shfaqur edhe një video e rrëzimit të një prej dronëve. Aty thuhet se rumunët e rrëzuan dronin me sistemin gjerman kundërajror Gepard.
Duke komentuar raportet për mbeturinat, një zëdhënës i NATO-s tha se nuk kishte asnjë indikacion për një sulm të qëllimshëm në territorin e aleancës.
“Ndërsa NATO nuk ka informacion që të sugjerojë ndonjë sulm të qëllimshëm nga Rusia në territorin aleat, këto akte janë të papërgjegjshme dhe potencialisht të rrezikshme”, tha zëdhënësi në një deklaratë.
Dy avionë luftarakë finlandezë F-18, pjesë e misioneve të mbikëqyrjes ajrore të NATO-s në Rumani, u përpoqën për të monitoruar sulmin, shtoi ministria.
Kërkimi për fragmente të tjera vazhdon dhe të gjitha vendet ku mund të kenë rënë dronët “ishin jashtë zonave të banuara dhe asnjë element infrastrukturor nuk u dëmtua”, tha ai.
Rumania ndan një kufi 650 km të gjatë me Ukrainën dhe në vitin e kaluar, pjesë të dronëve rusë kanë hyrë vazhdimisht në territorin e saj. Rusia sulmoi infrastrukturën në rajonin jugor të Odesës dhe Ukrainën qendrore, tha komandanti i forcave ajrore.