Presidenti i Republikës Srpska dhe i arratisuri nga drejtësia e Bosnjë e Hercegovinës, Milorad Dodik, këto ditë po qëndron në Izrael, ku merr pjesë në një konferencë për luftën kundër antisemitizmit.
Dodik deklaroi se është takuar me një burrë që kishte humbur djalin dhe gruan në sulmin e 7 tetorit.
“Ai më tregoi historinë e tij – për 12 orë kanë tentuar ta vrasin atë dhe familjen e tij. Nuk janë ndalur. Në fund vranë djalin dhe gruan e tij. Ata ishin të paarmatosur,” tha Dodik, duke theksuar se Evropa gabon kur thotë se Izraeli është problem.
Ai shtoi se gjendet aty për të mbështetur përpjekjet e Izraelit dhe popullit hebre.
“Ardhja e presidentit Trump është padyshim një lajm i mirë. Jam i bindur se ai është një njeri që e çliron botën,” u shpreh Dodik.
Në konferencë tha se për 20 ditë do të shënohet 80-vjetori i çlirimit të kampit Jasenovac.
“Në atë kamp u vranë 500.000 serbë dhe 35.000 hebrenj brenda katër vjetësh. Kampin e kishte organizuar Shteti i Pavarur i Kroacisë. Madje ishte edhe kamp për fëmijë,” deklaroi Dodik.
Më pas, Dodik tha: “Sot jetoj në Bosnje dhe Hercegovinë, më saktë në Republikën Srpska, dhe ja si e shënuam ne 7 tetorin,” duke treguar fotografi të Ndërtesës së Presidencës së ndriçuar me ngjyrat e flamurit izraelit.
“Duke mbështetur Izraelin, ndërsa kështu vepruan në Sarajevë myslimanët boshnjakë, të cilët dëshirojnë ta cilësojnë politikën aktuale të Izraelit si gjenocid të ri,” tha Dodik, duke treguar fotografi nga protestat në mbështetje të Gazës të mbajtura në mbarë Bosnjën.
Në këtë mënyrë, Dodik u përpoq të poshtërojë boshnjakët, duke dërguar mesazhin se Republika Srpska më 7 tetor 2023 kishte dërguar mesazhe mbështetjeje për Izraelin, ndërsa në rrugët e Sarajevës valëviteshin flamujt palestinezë.
Kujtojmë se gazeta më e vjetër hebraike në botë, The Jewish Chronicle, publikoi dje një tekst ku shprehej indinjatë për ftesën e Milorad Dodikut në konferencën kundër antisemitizmit në Jerusalemin. Në artikull theksohet se kjo ftesë është turpëruese dhe moralisht e papranueshme, duke pasur parasysh që Dodik për vite me radhë mohon gjenocidin në Srebrenicë.
