Presidenti i Republikës Sërpska, Milorad Dodik, vizitoi Izraelin pavarësisht se ndaj tij është lëshuar urdhër-arrest, dhe gjatë vizitës dha intervista për mediat izraelite. Në një nga bisedat, ai e krahasoi veten me Benjamin Netanyahun dhe tha se është i frymëzuar nga vendosmëria që tregon Izraeli.
Për agjencinë e lajmeve JNS, Dodik tha se në Jerusalem ka shumë ngjashmëri midis vendit të tij dhe Izraelit, si dhe midis tij dhe kryeministrit izraelit Benjamin Netanyahu. Në përgjigjen për këtë media, ai bëri disa paralele.
“Ka shumë. Të dy popujt tanë përballen me përpjekje të vazhdueshme për t’u mohuar e drejta për ekzistencë dhe për të vendosur vetë. Si kryeministri Netanyahu ashtu edhe unë jemi në shënjestër – jo sepse kemi bërë ndonjë gabim, por sepse nuk dorëzohemi. Kur nuk mund të të mundin në zgjedhje, përpiqen të të largojnë në mënyra të tjera,” tha Dodik.
Këtë javë, Dodik mbërriti në Izrael për të marrë pjesë në Konferencën Ndërkombëtare për Luftimin e Antisemitizmit dhe për të shprehur solidaritet, dhe para konferencës ai foli për JNS rreth “mbështetjes së tij të palëkundur për Izraelin”, të cilin e quajti gjithashtu “një vend që ai e respekton thellë për forcën, historinë dhe vendosmërinë që ka”.
I pyetur për ligjet separatiste të miratuara në Kuvendin Popullor të RS-së pas vendimit të shkallës së parë të Gjykatës së Bosnjë e Hercegovinës kundër tij, Dodik tha: “Nuk do të tërhiqem. Vetëm populli ka të drejtë të vendosë se kush e udhëheq – jo gjykatës të huaj dhe gjyqe të sajuara.”
“Një gjykatë politike jep vendime politike. Duke e përdorur sistemin gjyqësor në Sarajevë si armë, po përpiqen të arrijnë me anë të gjykimeve atë që nuk mund ta arrijnë me zgjedhje – të largojnë Milorad Dodikun nga politika. Nuk do të tërhiqem. Përgjigjja ime është e qartë: unë po ec përpara, po shkoj në Izrael, po shkoj tek miqtë dhe mund të mbroj interesat e njerëzve që më kanë zgjedhur kudo. Vetëm populli ka të drejtë të vendosë kush e udhëheq – jo gjykatës të huaj dhe gjyqe të sajuara,” tha ai.
Gjithashtu u pyet pse po e viziton Izraelin pikërisht në këtë moment.
“Sepse besoj se në kohë të vështira zbulohen miqtë e vërtetë. Izraeli po kalon sfida serioze, por po tregon një vendosmëri që më frymëzon. Kam ardhur për të dërguar një mesazh mbështetjeje për njerëzit që e dinë çfarë do të thotë të luftosh për lirinë tënde. Dhe për të konfirmuar se Republika Sërpska e kupton dhe e respekton atë luftë, sepse prej më shumë se tridhjetë vitesh po e zhvillojmë luftën tonë,” tha ai.
Ai theksoi se mbështetja për Izraelin është bindje e tij e sinqertë dhe jo përfitim politik, dhe se e mbështet Izraelin sepse beson në të drejtën e popujve për të vendosur vetë.
Gjatë udhëtimit të tij, Dodik vizitoi Yad Vashemin, u takua me udhëheqës izraelitë dhe vizitoi jugun e vendit. Pas takimit me fermerin Avid Bachar, i cili gjatë masakrës së 7 tetorit humbi gruan Dana, djalin 15-vjeçar Carmel dhe një këmbë, Dodik shprehu shqetësim për fatin e pengut serbo-izraelit Alon Ohel (24), i cili mbetet në robërinë e Hamasit.
Gjatë vizitës në memorialin e Festivalit Muzikor Nova, Dodik dhe shoqëruesit e tij qenë dëshmitarë kur Kupola e Hekurt (Iron Dome) kapi një raketë të lëshuar nga Gaza pikërisht mbi kokat e tyre.
