Milorad Dodik u takua në tetor të vitit 2024 me propagandistin rus Andrey Afanasyev dhe mori si dhuratë një flamur ushtarak me ikona ortodokse për mitropolitin e Banja Lukës, Jefrem.
Takimi i Milorad Dodikut me propagandistin kryesor rus Andrey Afanasyev kaloi pa shumë vëmendje nga publiku, por u nda nga vetë gazetari rus në profilin e tij në platformën X.
Gjatë këtij takimi, Dodik mori flamurin luftarak të ushtrisë ruse me emblemat e brigadave, të cilat përmbajnë ikona të shumta ortodokse.
“E pranoi atë si një shenjë të shenjtë dhe premtoi se do t’ia dorëzojë mitropolitit të Banja Lukës, Jefremit”, shkroi Afanasyev.
Shumica e ushtarëve rusë në njësi të ndryshme mbajnë si simbol në shpatullën e majtë ikonat ortodokse, duke e identifikuar veten si luftëtarë të ortodoksisë. Kjo praktikë filloi në fillim të vitit 2024, kur forcat ruse nisën të qepnin në uniformat e tyre ikonat e Jezus Krishtit.
Njësitë që mbajnë këto shenja quhen edhe “njësi ortodokse”, dhe Kisha Ortodokse Ruse mbështet fuqishëm këtë praktikë, e cila thekson identitetin e ushtrisë dhe popullit rus.
Kjo praktikë shfaqet në variante të ndryshme sipas njësive, ku secila ikonë ka një domethënie të veçantë për ushtarët rusë.
