Kompania ushtarake turke Baykar ka njoftuar se droni i saj i ri, Bayraktar TB3, ka hyrë në procesin e prodhimit masiv dhe se eksporti mund të fillojë brenda gjashtë muajve.
Droni luftarak pa pilot Bayraktar TB3 (UCAV), droni i ri që mund të palosë krahët dhe është projektuar për aeroplanmbajtësen e parë të vendit, TCG Anadolu, ka hyrë në prodhim masiv, konfirmoi këtë për mediat turke drejtori ekzekutiv Haluk Bayraktar.
Bayraktar theksoi se TB3 ndërtohet mbi suksesin e paraardhësit të tij, TB2, me aftësinë shtesë për të ulur në platforma detare.
Pikërisht këto karakteristika e bëjnë këtë dron pa pilot një shtesë të gjithanshme për arsenalin në rritje të teknologjisë mbrojtëse të Turqisë.
Më parë, drejtori ekzekutiv i kompanisë gjithashtu njoftoi se po ndajnë fonde për rritjen e prodhimit të komponentëve në kompani për t’u përballur me sfidat në zinxhirin e furnizimit në industri, duke treguar planet për të investuar rreth 300 milionë dollarë në zhvillimin e motorëve me reaktivë.
Bayraktar TB3 kreu fluturimin e tij të parë më 27 tetor 2023 dhe që atëherë janë kryer një sërë testesh për të verifikuar aftësitë e gjeneratës së re të dronëve që drejtohet nga Selcuk Bayraktar.
Ky do të jetë droni i parë i armatosur pa pilot me aftësinë për të ngritur dhe ulur nga anijet me pista të shkurtra. Gjenerata e re e dronit do të ketë mundësinë e komunikimit përtej vijës së shikimit, duke mundësuar kontrollin e tij nga distanca shumë të mëdha.
