Sipas të dhënave paraprake nga sondazhet pas votimeve, Bundestagu gjerman do të përjetojë një ndryshim politik, dhe opsioni më i mundshëm për formimin e qeverisë është një koalicion i madh midis CDU-së dhe SPD-së.
Në zgjedhjet federale në Gjermani, unioni konservator CDU/CSU i udhëhequr nga Friedrich Merz arriti fitore me 29 për qind të votave, duke siguruar 211 vende në Bundestag.
Nga ana tjetër, partia e djathtë ekstreme Alternativa për Gjermaninë (AfD) përmirësoi ndjeshëm rezultatin e saj, duke fituar 19.5 për qind të votave dhe 142 mandate, por mbetet e izoluar politikisht pasi partitë kryesore refuzojnë çdo bashkëpunim me të.
Partia Socialdemokrate e Gjermanisë (SPD), e udhëhequr nga kancelari Olaf Scholz, pësoi një humbje historike, duke u renditur në vendin e tretë me 16 për qind të votave dhe 116 mandate. Lideri i SPD-së e quajti këtë rezultat një “humbje historike”, gjë që komplikon më tej situatën politike brenda partisë.
Partia e Gjelbër, e udhëhequr nga Robert Habeck, fitoi 13.5 për qind të votave dhe siguroi 98 mandate në Bundestagun e ri, duke u bërë një partner i dëshirueshëm për koalicion. Megjithatë, disa segmente brenda CDU-së nuk janë të prirura të bashkëpunojnë me politikat që ndjekin të Gjelbrit.
Këto zgjedhje u zhvilluan në një atmosferë pakënaqësie të madhe të qytetarëve për shkak të stagnimit ekonomik, çështjeve të migracionit dhe pasigurive në lidhje me rolin e Gjermanisë në Evropë dhe aleancën e saj me Shtetet e Bashkuara të Amerikës.
Duke marrë parasysh balancën aktuale të forcave në Bundestag dhe realitetin politik, një koalicion i madh midis CDU-së dhe SPD-së duket si skenari më i mundshëm për formimin e qeverisë së re. Megjithatë, kjo shumicë është mjaft “e brishtë”, ndaj ka të ngjarë që të kërkohet edhe një partner i tretë për të siguruar stabilitetin qeverisës.
Nëse ky partner do të jetë Partia e Gjelbër apo ndonjë opsion tjetër politik, mbetet për t’u parë në ditët në vijim.
