Pasi Zëvendëspresidentja Kamala Harris akuzoi ish-presidentin Donald Trump për “kthim prapa” në një debat, fushata e Trumpit tha të enjten se nuk do të angazhohej për asnjë debat të ardhshëm derisa Partia Demokratike të zgjedhë zyrtarisht një kandidat, përcjell Reporteri.net.
Vendimi i Presidentit Joe Biden për t’u larguar nga kandidatura e Demokratëve të dielën vuri në dyshim planet e mëparshme të debatit. Ndërsa fushatat e Biden dhe Trump kishin rënë dakord për një debat të organizuar nga ABC më 10 shtator, është e paqartë nëse do të vazhdojë siç ishte planifikuar, raporton CNN.
“Kam rënë dakord për debatin më 10 shtator”, u tha Harris gazetarëve. “Tani duket se ai është duke u kthyer prapa. Por unë jam gati. Dhe mendoj se votuesit meritojnë të shohin ekranin e ndarë që ekziston në këtë garë në një skenë debati dhe, jam gati”, shtoi ajo.
Steven Cheung, drejtori i komunikimit të fushatës së Trump, tha se “do të ishte e papërshtatshme të planifikoheshin gjërat me Harris sepse demokratët shumë mirë mund të ndryshojnë ende mendjen e tyre”, pasi Harris është vetëm kandidate e supozuar e partisë, sipas tij.
Harris u përgjigj shpejt në mediat sociale.
“Çfarë ndodhi me “në çdo kohë, në çdo vend”?”, pyeti ajo në një postim në X.
Delegatët demokratë pritet të votojnë praktikisht për të konfirmuar Harrisin si kandidate presidenciale deri më 7 gusht. Trump, nga ana e tij, zyrtarisht siguroi nominimin republikan javën e kaluar në Konventën Kombëtare Republikane.
Trump u tha gazetarëve në fillim të kësaj jave se dëshiron të debatojë me Harrisin, por ende nuk ka rënë dakord për asgjë./Reporteri.net/.
