Një nga bashkëpunëtorët më të afërt të Donald Trumpit, presidentit të SHBA-së, miliarderi Elon Musk, po bëhet gjithnjë e më jopopullor mes bashkëpunëtorëve të tjerë të tij, shkruan Rolling Stone.
Sipas këtij mediumi amerikan, sjellja e Muskut në Shtëpinë e Bardhë po i zemëron jashtëzakonisht shumë bashkëpunëtorët e Trumpit dhe anëtarët e kabinetit të tij.
Veçanërisht i pakënaqur është Sekretari i Shtetit Marco Rubio, i cili e quan Muskun “xhaxhai i çmendur Elon”.
Anëtarë të tjerë të ekipit të Trumpit, të cilët kanë folur në mënyrë anonime për Rolling Stone, kanë zbuluar më shumë detaje për rënien e popullaritetit të Muskut në Shtëpinë e Bardhë.
“Isha në të njëjtën dhomë me Elonin dhe ai vazhdimisht përpiqej të ishte humorist. Por nuk është fare. Bën ato shakatë dhe batutat e tij, qesh vetë, dhe më pas duket gati i lënduar nëse nuk qesh me të. E përdor shpesh fjalën ‘i bezdisshëm’; shumë njerëz që duhet të punojnë me të e përdorin po ashtu. Por kjo fjalë nuk mjafton për ta përshkruar situatën. Elon thjesht mendon se është më i zgjuar se të gjithë të tjerët në dhomë dhe sillet si i tillë, edhe kur është e qartë se nuk e di fare për çfarë po flet”, tha një bashkëpunëtor i lartë i Trumpit.
Përveç kësaj, disa ide të tij kanë bërë që bashkëpunëtorët e Trumpit të largohen nga takimet dhe të pyesin nëse Musk është “nën ndikimin e drogës”. Madje është përmendur edhe ideja që miliarderi të testohet për lëndë narkotike para pjesëmarrjes në këto mbledhje.
“Të flasësh me të është si të dëgjosh gërvishtjen e gozhdëve të ndryshkura në një tabelë. Është personi më irritues me të cilin më është dashur të punoj, dhe kjo ju tregon gjithçka”, deklaroi një tjetër anëtar i ekipit të Trumpit.
Megjithëse Musk po bëhet gjithnjë e më jopopullor edhe mes qytetarëve amerikanë, Trump vazhdon ta mbajë atë në kabinetin e tij. Megjithatë, disa humbje të kandidatëve të mbështetur nga Musk dhe Trump mund të çojnë në ndryshime brenda Shtëpisë së Bardhë.
