Elon Musk ka shprehur mbështetje të heshtur për një mesazh që akuzon presidentin ukrainas Volodymyr Zelensky se i jep përparësi pushtetit dhe parasë mbi përpjekjet për paqe, ndërkohë që Shtetet e Bashkuara të Amerikës kërkojnë të negociojnë për përfundimin e luftës ruse.
“Zelensky nuk dëshiron paqe, ai dëshiron para dhe pushtet”, shkroi një përdorues në platformën X të Muskut të martën, ndaj së cilës ai reagoi me emoji-n “100 për qind”, duke sinjalizuar qartë aprovimin e tij.
Edhe pse fillimisht Musk ishte një mbështetës i qeverisë federale ukrainase, ai gjithnjë e më shumë po shfaqet në skenën ndërkombëtare, duke u përfshirë në politikën evropiane dhe duke mbështetur politikanët e ekstremit të djathtë nga Mbretëria e Bashkuar deri në Gjermani.
Musk ka bërë edhe më parë komente të ngjashme, duke ironizuar thirrjet e liderit ukrainas për ndihmë nga Perëndimi për t’u mbrojtur kundër pushtimit rus, por gjithashtu ka theksuar se Ukraina është një shtet i pavarur dhe nuk mund të detyrohet të ulet në tryezën e negociatave me Rusinë.
Në ditët e para të luftës, Musk i dhuroi Ukrainës mijëra terminale të internetit satelitor Starlink për të zëvendësuar shërbimet e komunikimit të shkatërruara nga Rusia dhe u vlerësua si një nga aleatët më të rëndësishëm të Kievit.
Megjithatë, kjo marrëdhënie u përmbys kur ai filloi të përhapte, përmes rrjetit X, atë që Ukraina e quajti propagandë pro-ruse.
Ndërkohë, negociatorët e Rusisë dhe SHBA-së u takuan dje në Arabinë Saudite, ndërsa Zelensky deklaroi se këto bisedime janë zhvilluar pa kontributin apo dijeninë e Kievit dhe se Ukraina nuk ka marrë pjesë. Edhe zyrtarët evropianë ishin lënë jashtë këtyre negociatave.
