Presidenti turk Rexhep Tajip Erdogan sulmoi Kombet e Bashkuara të mërkurën dhe i bëri thirrje “botës islame” të veprojë pas sulmeve të fundit vdekjeprurëse izraelite në Gaza.
Erdogan mbajti një fjalim gjatë një takimi të partisë AKP në Parlamentin turk
“OKB nuk mund të mbrojë as stafin e vet. Çfarë prisni të veproni? Fryma e Kombeve të Bashkuara ka vdekur në Gaza,” tha Erdogan.
Komentet e Erdoganit erdhën ndërsa Këshilli i Sigurimit i OKB-së mblidhet për të diskutuar një sulm vdekjeprurës izraelit në një kamp zhvendosjeje në perëndim të Rafah të martën që vrau 21 njerëz.
Udhëheqësi turk gjithashtu kritikoi vendet e tjera me shumicë myslimane për mosndërmarrjen e veprimeve të përbashkëta ndaj sulmit izraelit.
“Dua t’i drejtoj disa fjalë botës islame: Dhe çfarë prisni për të marrë një vendim të përbashkët? Zoti do të na mbajë ne dhe ju përgjegjës. Izraeli nuk është vetëm një kërcënim për Gazën, por edhe për të gjithë njerëzimin.” tha Erdogan.
Ai tha se për shkak të veprimeve izraelite, askush nuk është më i sigurt.
“Asnjë vend nuk është i sigurt derisa Izraeli të ndjekë ligjin ndërkombëtar dhe të ndihet i detyruar nga ligji ndërkombëtar”, shtoi Erdogan, duke përsëritur akuzën se Izraeli po kryen gjenocid në Gaza.
Ai kritikoi ashpër edhe qeveritë e Perëndimit, duke theksuar se ato janë dëshmitarë të “barbarizmit të Benjamin Netanyahut”.
“Shteti amerikan, ky gjak është edhe në duart tuaja. Krerë shtetesh në Evropë, ju jeni bërë bashkëfajtorë në vampirizmin e Izraelit sepse keni heshtur”, tha Erdogan.
