Erdoğan tha se me operacionet që Türkiye ka kryer vitet e fundit në Sirinë veriore dhe Irak, vendi “shpartalloi korridorin e terrorit që po tentohet të krijohet në kufirin tonë jugor”
Türkiye (Turqia) po ndërmerr hapa për të krijuar një zonë sigurie 30 kilometra në jug të kufirit të saj me Sirinë kundër kërcënimit të paraqitur nga grupi terrorist PKK/YPG, tha presidenti i vendit Recep Tayyip Erdoğan, raporton Anadolu Agency (AA).
“Zona jonë e sigurisë përbëhet nga një zonë 30 kilometra nga kufiri në jugun tonë. Ne nuk duam të shqetësohemi në këtë zonë sigurie”, tha Erdoğan në takimin e 30-të të konsultimit dhe vlerësimit të Partisë së Drejtësisë dhe Zhvillimit (AK) në kryeqytetin Ankara.
Erdoğan tha se me operacionet që Türkiye ka kryer vitet e fundit në Sirinë veriore dhe Irak, vendi “shpartalloi korridorin e terrorit që po tentohet të krijohet në kufirin tonë jugor”.
Në fushatën e saj terroriste më shumë se 35-vjeçare kundër Turqisë, PKK, e listuar si një organizatë terroriste nga Turqia, SHBA-ja dhe BE-ja, ka qenë përgjegjëse për vdekjen e mbi 40.000 njerëzve. YPG/PYD është dega siriane e PKK-së.
Erdoğan përsëriti gjithashtu qëndrimin e vendit të tij për synimin e Finlandës dhe Suedisë për t’u anëtarësuar në NATO, duke thënë: “E gjithë bota duhet ta dijë këtë. Vendet e NATO-s duhet të dinë së pari se NATO nuk është një organizatë që do të garantojë siguri për terroristët”.
“Unë flas sinqerisht dhe qartë për Suedinë dhe Finlandën. Kam folur edhe me sekretarin e përgjithshëm të NATO-s dje”, shtoi ai.
Suedia dhe Finlanda aplikuan zyrtarisht për t’u anëtarësuar në NATO më 18 maj, një vendim i nxitur nga lufta e Rusisë kundër Ukrainës, e cila filloi më 24 shkurt.
Por Türkiye, anëtare e vjetër e aleancës, ka shprehur kundërshtime ndaj aplikimeve të tyre për anëtarësim, duke kritikuar shtetet nordike për tolerimin dhe madje mbështetjen e grupeve terroriste si YPG/PKK dhe FETO.
Të gjitha aplikimet për anëtarësim duhet të miratohen me unanimitet në aleancën prej 30 anëtarësh që të jenë të suksesshme.
