“Ne kemi luftuar me të gjitha forcat tona për ta sjellë vendin tonë në nivelin e demokracisë dhe zhvillimit që meriton në përputhje me synimet e vitit 2023”, tha Erdoğan me rastin e përvjetorit të 950-të të fillimit të betejës së Malazgirtit
Presidenti i Turqisë, Recep Tayyip Erdoğan, me rastin e përvjetorit të 950-të të fillimit të betejës së Malazgirtit, tha se nga një vend që luftoi për ekzistencë brenda kufijve të tij, Turqia është shndërruar në një komb që ka një zë për çdo çështje kritike në rajon dhe në mbarë botën, raporton Anadolu Agency (AA).
“Ne kemi luftuar me të gjitha forcat tona për ta sjellë vendin tonë në nivelin e demokracisë dhe zhvillimit që meriton në përputhje me synimet e vitit 2023”, tha Erdoğan në një ceremoni të zhvilluar në provincën lindore turke Bitlis.
Ai u bëri thirrje brezave të rinj që të punojnë për ta vendosur Turqinë ndër vendet më të fuqishme në botë në të gjitha aspektet.
“Ka mbetur vetëm pak kohë për të ardhmen që simbolizon besimin, stabilitetin, prosperitetin, drejtësinë, ndërgjegjen, moralin që kemi ndërtuar me brezat tanë të rinj, për veten dhe të gjithë miqtë tanë”, tha ai, duke shtuar: “Tani e tutje, ne nuk do të lejojmë askënd ose ndonjë segment të dëmtojë vendin tonë, brezin tonë të ri”.
– Beteja e Malazgirtit
Kontrolli turk i Anadollit filloi me Betejën e Malazgirt, e njohur gjithashtu si Beteja e Manzikertit, më 26 gusht 1071, në të cilën turqit selxhukë të udhëhequr nga Sulltan Alparslan mposhtën një ushtri bizantine shumë më të madhe.
Fitorja përshpejtoi rënien e Perandorisë Bizantine dhe çoi në vendosjen e më shumë turqve në rajon, duke hapur rrugën si për Perandorinë Osmane ashtu edhe për Republikën moderne të Turqisë.
Shekuj më vonë, pushtimi i huaj nxiti Luftën e Pavarësisë së Turqisë në vitin 1919, në të cilën forcat turke, të udhëhequra nga Mustafa Kemali, përfundimisht dëbuan pushtuesit nga Anadolli.
Deri në fund të vitit 1922, të gjitha forcat e huaja kishin lënë territoret, të cilat u bënë pjesë e Republikës së Turqisë një vit më vonë.
