Recep Tayyip Erdoğan tha se shtëpitë e reja në disa fshatra mund të jenë gati deri në Ramazan Bajram, festë që fillon më 21 prill.
Pas tërmeteve masive që goditën pjesën jugore të Türkiye-s muajin e kaluar, presidenti Recep Tayyip Erdoğan u zotua të mos pushojë derisa të ringjallet i gjithë rajoni i goditur, raporton Anadolu.
“Ne nuk do të ndalemi derisa të ringjallim të gjitha qytetet tona të shkatërruara nga tërmeti, bashkë me fshatrat dhe qarqet e tyre”, tha Erdoğan në një ceremoni të hedhjes së gurthemelit për shtëpitë e reja në qytetin e goditur nga tërmeti, Gaziantep.
Duke thënë se po kryhet një “përgatitje gjithëpërfshirëse për transformimin e ndërtesave të rrezikshme në të gjithë Türkiye-n”, Erdoğan u zotua t’i “bëjë qytetet tona të sigurta, paqësore, rezistente ndaj tërmeteve, përmbytjeve, rrëshqitjeve të dheut, zjarreve dhe të gjitha rreziqeve të tjera sa më shpejt të jetë e mundur me modelin e Mburojës Kombëtare të Türkiye-s ndaj Rrezikut”.
“Qëllimi ynë është të ndërtojmë gjithsej 650.000 shtëpi të reja, 319.000 prej të cilave do të përfundojnë brenda një viti dhe t’ua dorëzojmë të prekurve nga tërmeti”, shtoi ai.
Duke folur më vonë në një iftar të organizuar në provincën jugore Kilis, Erdoğan riafirmoi angazhimin e qeverisë për t’ua dorëzuar shtëpitë e reja të prekurve nga tërmeti sa më shpejt të jetë e mundur.
Ai tha se shtëpitë e reja në disa fshatra mund të jenë gati deri në Ramazan Bajram, festë që fillon më 21 prill.
Më 6 shkurt, dy tërmete me magnitudë 7.7 dhe 7.6 ballë goditën 11 provinca turke, duke shkaktuar vdekjen e më shumë se 50 mijë personave.
Mbi 13.5 milionë njerëz në Türkiye janë prekur nga tërmetet, si dhe shumë të tjerë në Sirinë veriore.
Erdoğan gjithashtu kërkoi mbështetje në zgjedhjet e ardhshme presidenciale dhe parlamentare më 14 maj dhe shprehu dëshirën e tij që Türkiye të vazhdojë në “rrugën e duhur” pasi vendi dhe bota përballen me “një udhëkryq kritik”.
Në Türkiye do të mbahen zgjedhje më 14 maj, ku do të zgjidhet presidenti dhe anëtarët e parlamentit.
Nëse asnjë kandidat presidencial nuk merr shumicën në raundin e parë, bordi zgjedhor turk ka caktuar datën 28 maj si datë për raundin e dytë të mundshëm.
