Presidenti i Turqisë, Recep Tayyip Erdoğan, iu drejtua gazetarëve pas një turi të madh në Azi, gjatë të cilit vizitoi Indonezinë, Malajzinë dhe Pakistanin.
Gjatë bisedës me gazetarët, Erdogani shprehu kënaqësinë e tij për mikpritjen në të gjitha vendet aziatike që vizitoi.
“Interesi i sinqertë i miliona njerëzve mijëra kilometra larg Turqisë është padyshim një tregues konkret i lidhjes emocionale me kombin tonë. Doktorata e nderit që m’u dha në Malajzi, fjalimi para rreth 3.000 njerëzve së bashku me vëllanë tim të dashur Anwar Ibrahim, si dhe mënyra se si njerëzit në Indonezi dhe Pakistan na pritën përtej mikpritjes zyrtare, janë të gdhendura në kujtesën tonë,” tha Erdogani.
Ai foli gjithashtu për dhuratat që u bëri liderëve të vendeve pritëse.
“Me kënaqësi u prezantuam mikpritësve tanë automjetin tonë elektrik TOGG si një simbol i marrëdhënieve tona vëllazërore me të tria vendet. Ky tur ishte gjithashtu një vizitë që e vuri në praktikë vullnetin tonë për të forcuar bashkëpunimin me kontinentin në kuadër të nismës Reazia, të cilën e nisëm në vitin 2019,” theksoi ai.
Erdogani shtoi se Turqia synon të avancojë ndjeshëm marrëdhëniet ekonomike me vendet e Azisë.
“Qëllimi ynë është të zhvillojmë marrëdhënie institucionale me Shoqatën e Kombeve të Azisë Juglindore (ASEAN). Objektivi ynë përfundimtar është të bëhemi partner në dialog me ASEAN-in, me të cilin jemi partner sektorial në dialog që nga viti 2017. Në këtë kontekst, kemi shpjeguar pritshmëritë tona nga ASEAN-i, përmes Indonezisë, e cila është vendi pritës i organizatës, dhe nga Malajzia. Besoj se si Malajzia ashtu edhe Indonezia do të ofrojnë mbështetjen e nevojshme për vendin tonë,” përfundoi Erdogani.
