Presidenti Recep Tayyip Erdogan nisi zyrtarisht të hënën procesin e dërgimit të një shtetasi turk në Stacionin Hapësinor Ndërkombëtar (ISS) në kuadër të Programit Kombëtar Hapësinor.
Kreu i shtetit turk mbajti një konferencë për shtyp pas mbledhjes së kabinetit.
“Ne po fillojmë zyrtarisht procesin e dërgimit të një shtetasi turk në Stacionin Hapësinor Ndërkombëtar në kuadër të programit tonë kombëtar hapësinor”, njoftoi Presidenti Erdogan.
“Ky do të jetë mision kombëtar. Qytetari ynë, të cilin ne do ta dërgojmë në hapësirë, le të ketë shansin të kryejë teste dhe eksperimente shkencore që ai vetë ose shkencëtarë të tjerë në Turqi duan të bëjnë në një mjedis hapësinor pa gravitet.
Për të aplikuar në këtë mision kombëtar, ne formuam adresën uzaya.gov.tr dhe për këtë post mund të aplikojnë të gjithë shtetasit e Republikës së Turqisë më të rinj se 45 vjeç”, theksoi ai.
Erdogani sqaroi se dy kandidatët që do të përzgjidhen mes aplikimeve, do të marrin të gjitha trajnimet e nevojshme për procesin e udhëtimit në hapësirë si ambasadorë shkencorë të Turqisë.
“Në fund të trajnimit, njëri nga dy kandidatët do të dërgohet në Stacionin Hapësinor Ndërkombëtar në vitin 2023 për misionin historik që ka ndërmarrë. Flamuri që i ka hije më shumë qiellit, është padyshim flamuri ynë i kuq me gjysmëhënë dhe yll”, u shpreh lideri turk mes të tjerash.
