Anëtari i Senatit Amerikan nga Partia Demokrate, Cory Booker, përfundoi një fjalim historik në dhomën e sipërme të Kongresit të SHBA-së pas plot 25 orësh. Siç tha më herët, e bëri këtë për të treguar rezistencën e demokratëve ndaj veprimeve të gjera të presidentit Donald Trump.
Booker doli në Senat të hënën në mbrëmje, sipas kohës lokale, duke deklaruar se do të qëndronte aty “derisa të ishte fizikisht i aftë.”
Vetëm pas 25 orë e 5 minutash, senatori 55-vjeçar përfundoi fjalimin dhe u largua duke çaluar nga foltorja. Ai vendosi një rekord për fjalimin më të gjatë të pandërprerë në historinë e Senatit. Gjatë kësaj kohe, kolegët e tij demokratë e ndihmuan duke i dhënë pauza përmes pyetjeve të drejtuara atij.
“Nuk dua një version përrallor të historisë sonë! Nuk dua një histori të zbardhur, as të homogjenizuar. Më thuani të vërtetën e hidhur për Amerikën, sepse ajo flet për madhështinë tonë,” deklaroi Booker pas 20 orësh fjalimi, në një moment që u bë viral në rrjete sociale.
Lideri i demokratëve në Dhomën e Përfaqësuesve, Hakeem Jeffries, hyri në Senat për ta parë Booker-in të martën pasdite. Ai e quajti këtë “një moment jashtëzakonisht të fuqishëm,” duke thënë se Booker “thyeu rekordin e segregacionit dhe luftoi për ruajtjen e mënyrës amerikane të jetesës dhe demokracisë sonë.”
Në fund të fjalimit të tij, Booker tha: “Le të futemi në telashe të mira.”
Megjithatë, theksi i fjalimit të tij ishte thirrja ndaj partisë së tij: “Të gjithë duhet të shikojmë veten në pasqyrë dhe të themi: ‘Do të jemi më të mirë.’”
“Këto nuk janë kohë normale në kombin tonë. Dhe nuk duhet të trajtohen si të tilla në Senatin e Shteteve të Bashkuara. Kërcënimet ndaj popullit amerikan dhe ndaj demokracisë amerikane janë serioze dhe urgjente, dhe të gjithë duhet të bëjmë më shumë për t’u përballur me to,” tha Booker.
Ai kritikoi me orë të tëra shkurtesat në zyrat e sigurimeve shoqërore, që sipas tij janë udhëhequr nga Departamenti për Efikasitetin Qeveritar nën drejtimin e Elon Musk, këshilltar i Trumpit. Booker foli për ndikimet e urdhrave të hershme të Trumpit dhe shprehu shqetësime për mundësinë e shkurtimeve më të mëdha në rrjetin e sigurisë sociale, ndonëse ligjvënësit republikanë pretendojnë se programi nuk do të preket.
Ai gjithashtu lexoi letra nga votuesit, përfshirë një që shprehte shqetësim për deklaratat e Trumpit rreth aneksimit të Grenlandës dhe Kanadasë, si dhe për një “krizë kushtetuese që po afrohet.”
Gjatë ditës së martë, Booker mori ndihmë nga kolegët demokratë, të cilët i bënë pyetje për t’i dhënë momente pushimi.
“Fuqia juaj, qartësia juaj kanë qenë thjesht të jashtëzakonshme, dhe e gjithë Amerika po i kushton vëmendje asaj që po thoni,” i tha lideri i demokratëve në Senat, Chuck Schumer, ndërsa i drejtoi një pyetje Booker-it.
Ai shtoi se e gjithë Amerika duhet të jetë e vetëdijshme “se ka kaq shumë probleme, nga veprimet katastrofike të kësaj administrate.”
