Arsenali bërthamor i Francës me të vërtetë mund të ndihmojë në mbrojtjen e Polonisë, tha presidenti polak Andrzej Duda në një deklaratë të publikuar të premten.
Duda, i cili më parë ka kërkuar që Polonia të vendosë në territorin e saj një pjesë të armëve bërthamore të Shteteve të Bashkuara për të zmbrapsur agresionin rus, deklaroi se edhe kokat bërthamore franceze mund të forcojnë mbrojtjen e vendit të tij.
“Besoj se mund t’i pranojmë të dyja zgjidhjet. Këto dy ide nuk janë as kontradiktore dhe as që përjashtojnë njëra-tjetrën,” tha presidenti i Polonisë.
Presidenti francez Emmanuel Macron ka propozuar zgjerimin e të ashtuquajturës “ombrellë bërthamore” të Francës për aleatët e saj evropianë, në mesin e frikës se Rusia agresive mund të hedhë sytë nga krahina lindore e Bashkimit Evropian, pas agresioneve të saj ndaj Ukrainës në vitin 2014 dhe përsëri në vitin 2022.
Me rreth 300 koka bërthamore, Franca është e vetmja anëtare e BE-së që zotëron një arsenal të tillë dhe një nga tre anëtaret e NATO-s krahas SHBA-së dhe Mbretërisë së Bashkuar që kanë armë bërthamore.
Polonia dhe Danimarka më herët kanë shprehur gatishmëri ndaj idesë së vendosjes nën mbrojtjen bërthamore të Francës. Në mars, kryeministri polak Donald Tusk, që vjen nga një parti kundërshtare e presidentit Duda, tha se Polonia “po bën bisedime serioze” me Francën për këtë mundësi – e cila është bërë më e rëndësishme pas paralajmërimeve nga SHBA se një administratë e ardhshme e Donald Trump mund të mos ofrojë më garanci sigurie për Evropën.
Varshava vitet e fundit ka rritur në mënyrë dramatike ushtrinë e saj konvencionale, me forcat e saj luftarake prej 200,000 trupash – tani më të mëdhatë në BE – dhe synon të ndërtojë një ushtri prej gjysmë milioni ushtarësh në vitet e ardhshme.
