Një skenë kaotike ndodhi në një sallë gjyqi në New Mexico gjatë një seance për vrasje, kur dy kushërinj të viktimës sulmuan të dyshuarin.
Pamjet nga sallë gjyqi tregojnë momentet kur daja dhe njerku i viktimës sulmuan të dyshuarin për vrasje gjatë seancës të premten.
Policia arrestoi Alexander Ortizin shkurtin e kaluar për shkak të një të shtënë vdekjeprurëse ndaj ish-të dashurës së tij, Alianna Farfan, sipas një deklarate për shtyp nga autoritetet.
Ortiz është akuzuar për vrasje të shkallës së parë dhe në mars deklaroi se nuk është fajtor.
Ortiz ndodhej të premten në mëngjes në sallën e gjyqit të ndërtesës së Gjykatës së Qarkut Bernalillo në Albuquerque, gjatë një seance për të deklaruar fajësinë, kur ndodhi sulmi.
Në pamjet e videos shihet një burrë që kapërcen barrierën e sallës së gjyqit dhe kërkon Ortizin, i cili përpiqet të largohet. Një tjetër burrë i bashkohet disa sekonda më vonë.
Pas kësaj, disa persona shihen duke u përplasur dhe duke u rrahur.
Përleshja përfundon kur një zyrtar përdor armën e tij elektrike për të ndërhyrë.
Dokumentet gjyqësore të dorëzuara javën e kaluar në Gjykatën Metropolitane të New Mexico-s i identifikojnë sulmuesit si Lucero dhe Ysasi.
Ata kaluan barrierën e sallës së gjyqit, vrapuan drejt Ortizit dhe nisën ta godasin, duke lënduar edhe një zyrtar që po e mbronte të dyshuarin, sipas dokumenteve të gjykatës.
“Vrau kushërirën time si një frikacak,” citojnë mediat fjalët e Luceros, të cilat ai thuhet se ia tha një zëvendësi të policisë gjatë arrestimit dhe më pas shtoi:
“Ia vlejti çdo moment.”
Policia gjeti trupin e pajetë të Farfanit në apartamentin e saj më 11 janar 2024.
Hetuesit mësuan nga miqtë e saj se kishte pasur dhunë në marrëdhënien e saj me Ortizin dhe se i dyshuari ishte shumë i shqetësuar ditën kur ajo u qëllua.
“Farfan jetonte në apartamentin e saj dhe lejonte disa miq të qëndronin atje sepse kishte frikë të qëndronte vetëm,” tha një kushëri i saj.
Miqtë e saj i thanë hetuesve se kishin dëgjuar një të shtënë teksa Ortiz dhe Farfan ndodheshin atë mbrëmje në dhomën e saj të gjumit.
Pasi hapën derën me forcë, panë trupin e saj me një plagë në fytyrë, ndërsa sipas dëshmisë së tyre, Ortiz kishte ikur përmes dritares së dhomës.
Ai u arrestua pak më vonë pas një përleshjeje me policinë.
