Fëmijët e miliarderit Elon Musk kanë qenë në vende që shumë njerëz kurrë nuk do t’i shohin. Nga takimet me liderë botërorë deri te dhomat e kontrollit të lëshimeve të SpaceX, fëmijët e Musk janë shfaqur si asistentë të përhershëm në sipërmarrjet e tij teknologjike, të biznesit dhe tani edhe në politikë.
Ata kanë filluar të paraqiten shpesh në publik, veçanërisht pasi presidenti amerikan Donald Trump e ftoi miliarderin dhe bashkëthemeluesin e Tesla-s për të drejtuar Departamentin e sapoformuar për Efiçencën e Qeverisë.
Të mërkurën, djali pesëvjeçar i Musk u pa duke qëndruar në këndin e një tavoline në Zyrën Ovale, i veshur me një pallto ngjyrë kafe të errët dhe një këmishë.
Të enjten, pesëvjeçari X dhe vëllezërit e motrat e tij shkëmbyen dhurata me kryeministrin indian Narendra Modi, ndërsa i ati diskutonte për teknologjinë dhe inovacionin me liderin e huaj.
Musk është parë shpesh me fëmijët edhe para ardhjes së tij në Uashington, por shumë njerëz pyesin pse ai i merr fëmijët në takime kaq të rëndësishme.
“Përfshirja e fëmijëve në shumë paraqitje publike është kryesisht një lëvizje politike, një mënyrë për të ndikuar në mënyrën se si publiku e sheh atë,” thotë Kurt Braddock, profesor i komunikimit publik në një universitet amerikan.
Megjithatë, Braddock e konsideron si të pazakontë vendimin për të sjellë djalin pesëvjeçar të Musk në Zyrën Ovale.
Gjatë një konference 30-minutëshe për shtyp, djaloshi u pa i mërzitur dhe në një moment, sipas BBC, i tha dikujt në dhomë “mbylle gojën”.
Braddock beson se përfshirja e fëmijëve në paraqitjet publike është një taktikë për të tërhequr vëmendjen, gjë që është në favor të Trump dhe Musk.
Jon Haber, konsulent i komunikimit strategjik dhe ish-këshilltar në pesë fushata presidenciale, tha se fëmijët e Musk, të cilët shpesh krijojnë momente virale, janë të dobishëm për Trump.
Ish-e dashura e Musk dhe nëna e pesëvjeçarit, Grimes, e ka kritikuar paraqitjen e djalit të saj në Zyrën Ovale.
Në një intervistë për Vanity Fair në vitin 2022, ajo tha se nuk e mbështet ekspozimin e djalit të saj në qendër të vëmendjes.
Megjithatë, Musk është mësuar të marrë fëmijët e tij në ngjarjet që janë të rëndësishme për të. Për shembull, në vitin 2015, pesë nga fëmijët e tij u panë duke vrapuar nëpër korridoret e një fabrike të Tesla-s.
Edhe pse shpesh duhet të presin me orë të tëra, prania e fëmijëve të Musk ka krijuar një atmosferë më të lirshme, larg eventeve të rrepta dhe formale që organizojnë zakonisht kompanitë e tjera.
Musk ka dymbëdhjetë fëmijë nga tre gra të ndryshme.
Djali i tij më i njohur, X Æ A-Xii, ka pseudonimin “Lil X”, i njëjti simbol që Musk përdori kur riemërtoi Twitter-in pas blerjes së platformës.
Musk e ka quajtur pesëvjeçarin e tij “njeriun e tij për mbështetje emocionale”.
Biografi i tij, Walter Isaacson, ka thënë në një podcast se Musk është i përkushtuar ndaj fëmijëve të tij në një mënyrë “pothuajse obsesive”.
“Me fëmijët e tij, me të dashurat e tij, me gratë e tij – ai ka të njëjtin intensitet që ka në çdo aspekt tjetër të jetës së tij,” ka thënë Isaacson.
