Forcat izraelite plagosën 2 palestinezë dhe arrestuan 10 të tjerë në Bregun Perëndimor

Dy të rinj palestinezë u plagosën pasi ushtarët izraelitë hapën zjarr, ndërkohë raportohet se ushtria izraelite ka arrestuar 10 palestinezë në pjesë të ndryshme të Bregut Perëndimor

Dy palestinezë u plagosën në bastisjet e forcave izraelite në Bregun Perëndimor të pushtuar, transmeton Anadolu Agency (AA).

Sipas lajmit të radios “Zëri i Palestinës”, ka ndodhur një përleshje mes palestinezëve dhe forcave izraelite të cilët bastisën vendbanimin Akkabe në veri të qytetit Tubas.

Gjatë ngjarjeve, dy të rinj palestinezë u plagosën pasi ushtarët izraelitë hapën zjarr.

10 palestinezë të arrestuar

Agjencia zyrtare palestineze e lajmeve “WAFA” njoftoi se ushtria izraelite ka arrestuar 10 palestinezë në pjesë të ndryshme të Bregut Perëndimor.

Në artikull nuk u dha informacion i detajuar mbi arrestimet.

Viti më i përgjakshëm në Bregun Perëndimor

Ushtria izraelite ka shtuar bastisjet dhe ndalimet në pjesë të ndryshme të Bregut Perëndimor të pushtuar që nga viti i kaluar.

Përveç plumbave të gomës, ushtarët izraelitë ndërhyjnë shpesh me plumba të vërtetë kundër palestinezëve që protestojnë kundër bastisjeve. Ka përleshje mes grupeve të armatosura palestineze dhe ushtarëve izraelitë, veçanërisht në zona si Jenin dhe Nablus në veri të Bregut Perëndimor.

Sipas shifrave të publikuara nga Kombet e Bashkuara, viti 2022 është regjistruar si viti më i përgjakshëm për Bregun Perëndimor që nga viti 2005, kur OKB-ja filloi të mbante të dhëna në rajon.

Sipas kësaj, deri më 29 nëntor 2022, 205 palestinezë, përfshirë 47 fëmijë, u vranë, 153 në Bregun Perëndimor dhe 52 në Gaza. OKB-ja deklaroi se këto vdekje “në shumicën e rasteve ndodhën për shkak të përdorimit joproporcional dhe vdekjeprurës të forcës nga autoritetet izraelite”.

Kategoritë
BotaLajme