Termocentrali i fundit britanik me qymyr mbyllet sot, duke i dhënë fund një tradite 142-vjeçare të prodhimit të energjisë elektrike me qymyr në vendin që nisi revolucionin industrial.
Ratcliffe-on-Soar, i vendosur në Anglinë qendrore, do të përfundojë ndërrimin e tij të fundit në mesnatë, pas më shumë se gjysmë shekulli pune. Shumica e 170 punonjësve të mbetur do të vazhdojnë të punojnë gjatë procesit dyvjeçar të çmontimit.
Qeveria e Mbretërisë së Bashkuar e përshëndeti mbylljen si një moment historik në përpjekjet për të prodhuar të gjithë energjinë britanike nga burimet e rinovueshme deri në vitin 2030.
Me mbylljen, Britania bëhet vendi i parë në grupin e shtatë ekonomive të mëdha që heq gradualisht qymyrin, edhe pse disa vende të tjera evropiane, përfshirë Suedinë dhe Belgjikën, e kanë bërë këtë tashmë.
Ministri i Energjisë, Michael Shanks, tha se mbyllja e termocentralit “shënon fundin e një epoke dhe punëtorët me të drejtë mund të jenë krenarë për punën e tyre të gjatë mbi 140 vjet”.
“Epoka e qymyrit mund të përfundojë, por një epokë e re e punëve të mira në sektorin e energjisë për vendin tonë sapo ka filluar”, tha ai.
Termocentrali i Ratcliffe-on-Soar, i hapur në vitin 1968, është një pikë referimi, tetë kullat e tij të mëdha ftohëse prej betoni dhe oxhaku 199 metra i lartë shihen nga miliona njerëz çdo vit që kalojnë në autostradën M1.
Në vitin 1990, qymyri siguronte rreth 80 për qind të energjisë elektrike në Britani. Deri në vitin 2012 kishte rënë në 39 për qind, ndërsa në vitin 2023 ishte vetëm një për qind. Më shumë se gjysma e energjisë elektrike në Britani tani vjen nga burimet e rinovueshme si era dhe energjia diellore, ndërsa pjesa tjetër nga gazi natyror dhe energjia bërthamore.
“Qymyri ishte dhjetë vjet më parë burimi kryesor i energjisë në këtë vend, duke prodhuar një të tretën e energjisë elektrike. Të arrish në këtë pikë vetëm një dekadë më vonë është një arritje e pabesueshme”, tha Dara Wiyas, zëvendës drejtoresha ekzekutive e trupit tregtar Energy UK.
