Gazeta më e vjetër hebraike në botë, The Jewish Chronicle, ka publikuar një artikull ku shpreh indinjatën e saj për ftesën që iu bë Milorad Dodikut për të marrë pjesë në një konferencë për antisemitizmin në Jeruzalem. Në artikull theksohet se ky veprim është i turpshëm dhe moralisht i papranueshëm, duke marrë parasysh se Dodiku prej vitesh mohon gjenocidin në Srebrenicë.
Autori i artikullit ngre hapur pyetjen se si është e mundur që Izraeli, një shtet që angazhohet për kujtesën e viktimave të Holokaustit dhe luftën kundër antisemitizmit, të ftojë në një ngjarje të tillë një politikan që mohon krimet masive kundër boshnjakëve në Bosnje dhe Hercegovinë.
“Dua që lexuesit të imagjinojnë myslimanë që bëjnë gjithçka që komuniteti hebraik mund të kërkojë prej tyre – e njohin dhe e dënojnë antisemitizmin islamik, ndërtojnë dialog ndërfetar, tregojnë dhembshuri dhe vetëkritikë,” shkruan autori. Megjithatë, ai shton se këta të njëjtë tani po shohin se si qeveria izraelite “tall cinikisht viktimat myslimane të gjenocidit.”
Kritikat përqendrohen veçanërisht ndaj ministrit izraelit për diasporën, Amichai Chikli, organizator i konferencës, vendimet e të cilit janë dënuar nga një numër i madh personalitetesh të njohura.
Rabinët kryesorë si Sir Ephraim Mirvis kanë refuzuar të marrin pjesë në këtë tubim për shkak të “pranisë së disa politikanëve ekstremistë të djathtë”, ndërsa edhe aktivistë të tjerë të shquar kundër antisemitizmit, si Lord Mann, filozofi Bernard-Henri Lévy dhe aktivisti David Hirsh, gjithashtu kanë refuzuar pjesëmarrjen.
Në tekst theksohet se qeveria izraelite ka ftuar në konferencë përfaqësues të partive të djathta ekstreme nga e gjithë Evropa, përfshirë Fideszin e Viktor Orbán nga Hungaria dhe Tubimin Kombëtar të Marine Le Pen nga Franca, një parti e themeluar nga një mohues i njohur i Holokaustit.
“Mund të imagjinoni sa mirënjohës do të jenë në Tubimin Kombëtar. Falë shërbimit të Netanyahut për larjen e reputacionit, ata do të mund të hedhin poshtë të gjitha akuzat për racizëm dhe të thonë se, as më shumë e as më pak, por vetë qeveria izraelite i sheh si prijës të luftës kundër antisemitizmit,” shkruhet në artikull.
Megjithatë, ajo që është veçanërisht tronditëse, sipas autorit, është ftesa për Milorad Dodikun, presidentin e Republikës Serbe.
“Nuk keni dëgjuar kurrë për Dodikun? Më lejoni t’ju shpjegoj,” shkruan gazetari, duke përkujtuar luftën në Bosnje dhe Hercegovinë në vitet 1990, kur forcat serbe të frymëzuara nga politika e spastrimit etnik të Millosheviqit kryen krime të shumta kundër boshnjakëve, përfshirë gjenocidin në Srebrenicë.
Në artikull përkujtohet se edhe gjatë luftës, gazetarët britanikë zbuluan kampet serbe të përqendrimit në Bosnje, ku të burgosurit dukeshin të uritur pas telave me gjemba, dhe se bota u trondit nga gjenocidi i vitit 1995 në Srebrenicë, kur forcat e Ratko Mladiqit vranë 8.000 burra dhe djem boshnjakë.
Por, menjëherë më pas filloi mohimi i krimeve, dhe Dodiku e ndërtoi pikërisht mbi atë retorikë fuqinë e tij politike. “Ai u tha serbëve në pjesën e tij të Bosnjës atë që donin të dëgjonin – se gjenocidi në Srebrenicë ‘nuk kishte ndodhur’,” thuhet në artikull.
Autori shton se mohimi i gjenocidit është mizor, sepse “u thotë familjeve të viktimave se nuk kishte vrasës dhe për rrjedhojë as viktima.”
Duke cituar filozofin Jean-Paul Sartre, autori thekson se mohuesit e gjenocidit janë të ngjashëm me antisemitët e epokës naziste, sepse nuk përpiqen të bindin të tjerët me argumente, por përdorin gënjeshtra për të frikësuar dhe për të shkaktuar konfuzion.
“I tillë është Milorad Dodik,” përfundon gazetari.
Në fund të artikullit, shprehet neveri për faktin se qeveria izraelite ka vendosur me vetëdije të ftojë në një konferencë kundër antisemitizmit një politikan që mohon gjenocidin ndaj boshnjakëve.
“Çfarë duhet të konkludojnë myslimanët – apo kushdo me një ndjenjë elementare të dinjitetit – nga kjo? Se qeveria izraelite tani është aq ekstreme, sa i sheh mohuesit e gjenocidit ndaj myslimanëve si aleatë në luftën kundër antisemitizmit?”
Autori e përmbyll tekstin me fjalë të ashpra: “Do të doja me të vërtetë të dëgjoja një shpjegim nga qeveria izraelite, sepse në këtë moment sjellja e tyre duket e pashpjegueshëm dhe turpëruese.”
The Jewish Chronicle është gazetë hebraike javore me qendër në Londër. E themeluar në vitin 1841, është gazeta hebraike më e vjetër në botë që botohet në mënyrë të pandërprerë. Redaktori i saj është Daniel Schwammenthal.
