Kryeministrja e Italisë, Giorgia Meloni, u takua sot në Shtëpinë e Bardhë me presidentin amerikan Donald Trump, dhe një reagim i saj tërhoqi vëmendje të veçantë.
Pas takimit, Meloni dhe Trump mbajtën një konferencë për media ku folën për përshtypjet nga biseda e tyre.
Pas fjalëve hyrëse të Trumpit dhe Melonit, presidenti amerikan u tha gazetarëve të pranishëm se mund të fillonin me pyetjet. Megjithatë, gazetarët nuk ndoqën ndonjë rend të caktuar dhe të gjithë u përpoqën njëkohësisht të bënin pyetje për Trumpin dhe Melonin.
Në atë moment, kryeministrja italiane nuk mundi ta fshehë reagimin e saj dhe me një gjest të vetëm tregoi qartë se ishte e befasuar nga një lloj “cunami mediatik” që pasoi. Reagimi i saj mund të shihet në minutën 5:25 të videos së publikuar nga Shtëpia e Bardhë.
Konferencat për shtyp në Shtëpinë e Bardhë gjithmonë kanë qenë të ndjekura gjerësisht nga mediat, por me ardhjen e Donald Trumpit, ky segment u ngrit në një nivel më të lartë. Edhe pse pyetjet e gazetarëve pas takimeve të Trumpit me liderë të tjerë zakonisht janë të zakonshme dhe nuk dalin nga një kornizë e caktuar, disa situata kanë treguar se gjërat mund të jenë shumë ndryshe dhe më të sikletshme për mysafirin.
Këtë e ka ndjerë më së miri presidenti i Ukrainës, Volodymyr Zelensky, të cilit një gazetar amerikan i bëri pyetjen pse nuk mban kurrë kostum. Kjo pyetje ishte hyrje në një përplasje që u bë e njohur në mbarë botën dhe në të cilën u përfshinë anëtarë të administratës së Trumpit dhe vetë Zelensky.
