Në një tekst të publikuar nga New York Times, ish dhe zyrtarë aktualë izraelitë kanë theksuar se objektivat e luftës që shpalli Benjamin Netanyahu në Gaza nuk janë të arritshme dhe se Hamasi madje po fiton në këtë luftë.
“Hamasi po fiton në këtë luftë. Ushtarët tanë fitojnë në çdo përballje taktike me Hamasin, por ne po e humbasim luftën, dhe kjo në një masë të madhe,” tha gjeneralmajori Gadi Shamni, ish-komandant i divizionit të ushtrisë izraelite në Gaza.
Mijëra luftëtarë dhe zyrtarë të qeverisë së Hamasit vazhdojnë të kontrollojnë pjesë të mëdha të Gazës. Në qytetet ku forcat izraelite për një kohë të shkurtër morën kontrollin, largimi i tyre përfundimtar la një boshllëk që Hamasi dhe grupe të tjera militante e mbushën shpejt.
Gjenerali Shamni tha se, edhe pse është e padiskutueshme që Izraeli ka shkatërruar kapacitetet ushtarake të Hamasit, Hamasi rimori qytetet brenda “15 minutash” pas tërheqjes së forcave izraelite.
“Nuk ka askënd që mund të sfidojë Hamasin atje pas largimit të forcave izraelite,” tha ai.
Dështimi më i madh, tha gjenerali Shamni, është se Netanyahu nuk përpiqet të vendosë një trup alternativ real të qeverisjes në Gaza pas tërheqjes izraelite.
Në fund të qershorit, kundëradmirali Daniel Hagari, zëdhënësi i ushtrisë izraelite, hodhi poshtë pretendimin e Netanyahut se Hamasi mund të fshihet.
Muajin e kaluar, ministri i mbrojtjes Yoav Gallant përshkroi sloganin e Netanyahut për “fitoren e plotë” si “marrëzi”. Dhe disa zyrtarë izraelitë të sigurisë thanë se do ta lënë betejën me Hamasin për fëmijët e tyre.
