Gjermania akoma “pa vendim” për dërgimin e tankeve ‘Leopard’ në Ukrainë

Pistorius theksoi se për shkak të pasojave të mundshme të një mase të tillë, aleatët në ditët në vijim duhet të analizojnë me kujdes përfitimet dhe rreziqet e kësaj mase para se të merret një vendim përfundimtar për këtë çështje

Ministri gjerman i Mbrojtjes, Boris Pistorius, ka bërë të ditur se Gjermania dhe aleatët e saj diskutuan dërgimin e tankeve ‘Leopard’ në Ukrainë, por ka theksuar se asnjë vendim nuk është marrë gjatë takimit, transmeton Anadolu Agency (AA).

“Nuk mund të themi sot se kur do të merret një vendim për tanket ‘Leopard’ dhe cili do të jetë ky vendim”, u tha Pistorius gazetarëve pas seancës së mëngjesit të takimit të Grupit të Kontaktit të Mbrojtjes të Ukrainës në bazën ajrore Rammstein në Gjermani.

Pistorius theksoi se për shkak të pasojave të mundshme të një mase të tillë, aleatët në ditët në vijim duhet të analizojnë me kujdes përfitimet dhe rreziqet e kësaj mase para se të merret një vendim përfundimtar për këtë çështje.

Ai hodhi poshtë kritikat e mediave se Gjermania po bllokon dërgesat e tankeve ‘Leopard’ në një kohë kur ato i nevojiten urgjentisht Ukrainës.

“Ne vërtet nuk po hezitojmë, thjesht po përpiqemi të balancojmë me kujdes të gjitha të mirat dhe të këqijat”, tha Pistorius, duke shtuar se Gjermania nuk është e vetme dhe se shqetësimet e Berlinit ndahen edhe nga të tjerët.

Ai u tha gazetarëve se këtë mëngjes urdhëroi ministrinë të ekzaminojë tanket e disponueshme ‘Leopard’ në rezervat e ushtrisë dhe të industrisë së mbrojtjes për të qenë të gatshëm për një vendim të mundshëm të aleatëve në të ardhmen.

Rreth 50 ministra të mbrojtjes dhe zyrtarë të lartë po marrin pjesë në takimin e Grupit të Kontaktit të Ukrainës në bazën ajrore Rammstein në Gjermani, duke përfshirë ministrin ukrainas të Mbrojtjes, Oleksii Reznikov, sekretarin e përgjithshëm të NATO-s, Jens Stoltenberg dhe ministrin e Mbrojtjes së Türkiyes, Hulusi Akar.

Kategoritë
BotaLajme