Gratë morën pjesë zyrtarisht në një ndeshje të ligës iraniane për herë të parë që nga Revolucioni Islamik në 1979, raportuan mediat lokale.
Rreth 500 femra ishin në tribunat e stadiumit Azadi në Teheran, ku u luajt ndeshja e ligës vendase të enjten mbrëma. Deri më tani, femrave u është ndaluar të vijnë në stadiumet ku luajnë skuadrat e meshkujve. Ndeshja e fundit që mund të shikonin ishte një kualifikuese e Kupës së Botës tre vjet më parë. Në atë kohë, autoritetet u përkulën nën presion pas vdekjes së 29-vjeçares Sahar Khodayari, e cila i vuri flakën vetes në pritje të gjyqit për përpjekjen për të hyrë në stadium e maskuar si burrë.
Khodayari u bë e njohur si “Vajza Blu” për shkak të ekipit që mbështeti dhe u bë simbol i luftës për të drejtat e grave në Iran.
Mediat iraniane raportuan se vendimi për të lejuar gratë të marrin pjesë në ndeshjen e së enjtes erdhi pasi FIFA u dërgoi një letër autoriteteve iraniane duke u kërkuar atyre që të lejonin gratë në stadium. Ndalimet e këtij lloji janë kundër statuteve ndërkombëtare të futbollit.
Femrat që erdhën në ndeshjen mes Estaqlal dhe Mesa-e Kerman u ulën veçmas nga meshkujt. Shumë valëvitën flamuj, mbanin ngjyrat e klubit dhe brohorisnin “Vajza blu” për nder të Khodayara.