Ishulli i madh Grenlanda, i cili është pjesë e Mbretërisë së Danimarkës, planifikon të përfshihet në futbollin ndërkombëtar duke formuar një ekip kombëtar që do të marrë pjesë në gara zyrtare.
Ligjërisht, Grenlanda nuk mund të jetë pjesë e UEFA-s. Edhe pse gjeografikisht i përket UEFA-s përmes Danimarkës, nuk mund të anëtarësohet, pasi statuti i UEFA-s përjashton rajonet që nuk janë të pavarura. Situata është ndryshe për Ishujt Faroe, të cilët gjithashtu i përkasin Danimarkës, por u përfshinë në UEFA para se të miratohej ky statut në vitin 1990.
Megjithatë, në Grenlandë kanë gjetur një zgjidhje dhe kanë paraqitur kërkesën për t’iu bashkuar CONCACAF-it, organizatës ombrellë për futbollin në Amerikën e Veriut dhe Qendrore.
Ata kanë kërkuar të drejtat e tyre përmes Gjykatës së Arbitrazhit Sportiv (CAS), dhe në favor të tyre është fakti që disa ekipe anëtare të CONCACAF-it, si Aruba, Guadeloupe dhe Martinique, nuk janë territore të pavarura.
“Situata aktuale e futbollit në Grenlandë është jashtëzakonisht e mirë. Është sporti më popullor. Kemi lojtarë të të gjitha moshave dhe gjinive, të gatshëm të luajnë në çdo lloj fushe dhe në çdo kusht moti. Kemi 5,600 futbollistë të regjistruar, gjë që na bën një nga vendet me numrin më të lartë të lojtarëve për frymë,” tha Kenneth Kleist, presidenti i KAK-ut, federatës lokale të futbollit.
Sa i përket fushave, bar natyral është një burim i kufizuar në Grenlandë dhe janë ndërtuar 18 fusha artificiale. Kleist thekson se kjo është një avantazh, pasi lojtarët janë mësuar me kushte të ndryshme dhe luajnë futboll teknik të nivelit të mirë.
Federata e Futbollit të Grenlandës vitin e kaluar paraqiti kërkesën për t’iu bashkuar CONCACAF-it dhe tani presin një përgjigje pozitive me ndihmën e Gjykatës së Arbitrazhit Sportiv. Ata thonë se kanë vlerësuar gjithçka, kanë nisur projektin para 10 vitesh dhe deklarojnë se kanë përmbushur të gjitha kriteret organizative.
