Një grua që u rrëmbye si fëmijë në Connecticut është gjetur e gjallë 25 vjet më vonë në Meksikë, dhe identiteti i saj është konfirmuar përmes një testi ADN-je.
Andrea Michelle Reyes ishte vetëm dy vjeç kur në tetor të vitit 1999 u mor nga nëna e saj, Rosa Tenorio, sipas një deklarate të policisë së New Haven. Tenorio nuk kishte kujdestari ligjore mbi Reyes, e cila në kohën e rrëmbimit ishte nën kujdesin e babait të saj, njoftoi policia.
Policia e New Haven dhe FBI kishin lëshuar një urdhër arresti për Tenorio, e cila dyshohej se kishte ikur me vajzën e saj në Meksikë. Babai i Andreas kishte udhëtuar disa herë në Meksikë për ta gjetur, por nuk kishte arritur të kontaktonte as me të as me nënën e saj.
Rasti i zhdukjes së saj mbeti i pazgjidhur deri në vitin 2023, kur një detektive e policisë rinisi hetimin mbi rrëmbimin e Andreas.
“Duke përdorur një kombinim intervistash, urdhrash kontrolli dhe rrjete sociale,” detektivja Kealyn Nivakoff përcaktoi se Reyes po qëndronte në qytetin Puebla të Meksikës, një qytet me mbi një milion banorë, pasi ishte rrëmbyer nga Tenorio, raportoi policia.
Një test i avancuar i ADN-së konfirmoi lidhjen mes Reyes dhe babait të saj, të cilët pas më shumë se dy dekadash arritën më në fund të ribashkoheshin.
“Gjatë viteve, babai i Andreas e kërkoi pa pushim, por nuk kishte dëgjuar kurrë asgjë nga vajza e tij apo nga nëna e saj,” njoftoi kompania e testimit të ADN-së, Othram, e cila ishte e përfshirë në rast.
Identifikimi i Reyes ishte pjesë e një iniciative për të zgjidhur më shumë se 500 raste që përfshijnë të mitur dhe janë të regjistruara në Sistemin Kombëtar të Personave të Zhdukur dhe të Paidentifikuar, tha kompania.
“Ky rast pasqyron punën e palodhur të oficerëve dhe detektivëve tanë. Edhe pse rastet mund të mbeten pa të dhëna të reja për një kohë të gjatë, asnjë rast i ftohtë nuk mbyllet kurrë plotësisht. Ne mbetemi të përkushtuar për të zgjidhur çdo rast të pazgjidhur, dhe ky është një shembull i përsosur i këtij angazhimi,” tha shefi i policisë së New Haven, Karl Jacobson.
Reyes, e cila tani është 27 vjeç, është banore e Meksikës, tha Othram. Urdhri i arrestit për Tenorio mbetet aktiv dhe i vlefshëm brenda Shteteve të Bashkuara, sipas policisë, e cila shtoi se beson që e dyshuara për rrëmbimin ndodhet ende në Meksikë.
