Hamas ka bërë të ditur se lirimi i radhës i të burgosurve, që ishte planifikuar të ndodhte të shtunën në Gaza, është shtyrë, duke akuzuar Izraelin për shkelje të marrëveshjes së armëpushimit.
Në një postim në X, Abu Obeida, zëdhënësi i brigadave Qassam, krahu i armatosur i Hamasit, deklaroi se transferimi i të burgosurve “që duhej të liroheshin të shtunën e ardhshme… do të shtyhet deri në një njoftim tjetër dhe derisa pushtimi të përmbushë dhe të rikthejë të drejtat për javët e kaluara.”
“Ne konfirmojmë angazhimin tonë ndaj kushteve të marrëveshjes për aq kohë sa pushtimi respekton ato,” thuhet në deklaratën e Hamasit.
Hamas të shtunën ka liruar tre të burgosur në shkëmbimin e katërt të të burgosurve që nga hyrja në fuqi e armëpushimit më 19 janar. Në Gaza mbeten ende 79 persona të rrëmbyer më 7 tetor 2023. Vetëm 20 prej tyre pritet të lirohen në këtë fazë të armëpushimit, nga të cilët tetë thuhet se janë të vdekur.
Në këmbim, Izraeli ka liruar 183 të burgosur palestinezë, nga të cilët 18 po vuanin dënim të përjetshëm. Shumica e tyre ishin mbajtur në Gaza që nga 7 tetori dhe ndaj tyre nuk ishin ngritur akuza publike.
Sipas marrëveshjes së nënshkruar në Katar muajin e kaluar, negociatat për fillimin e fazës së dytë duhej të nisnin të hënën.
Më herët të hënën, Zyra për Media e Qeverisë së Gazës tha se Izraeli kishte refuzuar të lejonte hyrjen e furnizimeve për strehime, të përcaktuara në marrëveshjen e armëpushimit.
