“Izraeli synonte të shpëtonte pengjet, të shfaroste rezistencën, veçanërisht Hamasin, dhe të pushtonte plotësisht Gazën. Asnjë nga këto objektiva nuk u arrit”, tha Mohammad Nazzal.
Anëtari i lartë i byrosë politike të Hamasit, Mohammad Nazzal, tha se dështimi i Izraelit për të arritur objektivat e tij ushtarakë e detyroi atë të kërkonte lëshime në tryezën e negociatave.
“Izraeli synonte të shpëtonte pengjet, të shfaroste rezistencën, veçanërisht Hamasin, dhe të pushtonte plotësisht Gazën. Asnjë nga këto objektiva nuk u arrit”, tha Nazzal në një intervistë ekskluzive për Anadolu, duke shtuar:
“Ata nuk mund t’i lironin pengjet e tyre përmes operacioneve ushtarake dhe duhej të drejtoheshin në negociata. Në këtë pikë, pengjet mund të lirohen vetëm përmes marrëveshjes së armëpushimit”, tha ai.
Ai theksoi se Izraeli, në pamundësi për të arritur qëllimet e tij me veprime ushtarake, u përpoq të fitonte me diplomaci atë që nuk mund ta arrinte në fushëbetejë.
“Izraeli u angazhua shumë për të përfituar lëshime gjatë negociatave”, vuri në dukje Nazzal, duke shtuar: “Negociatat për armëpushimin janë padyshim një pjesë kritike e luftës politike, jo vetëm ushtarake”.
Ai më tej theksoi se qëllimet e deklaruara të Izraelit ishin të paarritshme përmes agresionit të tij ushtarak.
“Për gati një vit, ndërmjetësit nga Katari, Egjipti dhe SHBA-ja kanë udhëhequr këtë proces të mundimshëm. Paaftësia e Izraelit për të arritur objektivat e tij përmes operacioneve ushtarake përfundimisht i detyroi ata në tryezën e negociatave”, theksoi Nazzal.
Teksa foli për negociatat, Nazzal pranoi rolin kyç të Türkiyes në arritjen e marrëveshjes së armëpushimit.
“Türkiye nuk ka qenë kurrë e larguar nga këto negociata dhe ka ndjekur nga afër zhvillimet. Pavarësisht kundërshtimeve të Izraelit, ne vazhdimisht theksuam nevojën për përfshirjen e Türkiyes”, tha ai, duke njohur ndikimin e Türkiyes edhe pa pjesëmarrje të drejtpërdrejtë.
“Edhe pse nuk ishin drejtpërdrejt në tryezë, turqit monitoruan vazhdimisht dhe me vendosmëri negociatat. Ka qenë i madh ndikimi i tyre në formësimin e procesit dhe marrëveshjes që rezultoi”, shtoi ai.
Teksa njohu ndikimin e presidentit të zgjedhur të SHBA-së, Donald Trump në Izrael, Nazzal theksoi se arsyeja e vërtetë që Izraeli ra dakord për armëpushimin ishte rezistenca palestineze dhe dështimi izraelit për të arritur qëllimet e tij përmes mjeteve ushtarake.
Nazzal thotë se kryeministri izraelit Benjamin Netanyahu e pranoi marrëveshjen jo vetëm për shkak të presionit të Trump-it, por edhe si rezultat i përpjekjeve të rezistencës.
Ai gjithashtu iu referua komenteve të Netanyahu-t për rritjen e pranisë ushtarake të Izraelit në Korridorin Filadelfi të Gazës.
“Netanyahu bën deklarata të tilla për të mbuluar dështimet. Qëllimi ynë është të sigurojmë largimin e ushtarëve izraelitë nga korridori i Filadelfit”, theksoi Nazzal.
Ai shpjegoi gjithashtu vonesat në dorëzimin e listave të pengjeve, duke i atribuar këto vonesa në sulmet e vazhdueshme izraelite në Gaza.
“Pengjet janë në vende të ndryshme dhe sulmet e vazhdueshme pengojnë komunikimin”, tha ai.
Nazzal paralajmëroi se Hamasi është i përgatitur për çdo shkelje të mundshme të armëpushimit nga Izraeli.
“Ne jemi të përkushtuar ndaj armëpushimit, por nëse Netanyahu e shkel atë, ne jemi të përgatitur për çdo skenar”, tha ai.
Në qeverisjen e Gazës pas armëpushimit, Nazzal propozoi një administratë teknokratike për të përfshirë të gjitha grupet palestineze.
“Ne nuk pretendojmë qeverisje ekskluzive mbi Gazën. Ne propozojmë formimin e një ekipi teknokratik që përfshin të gjitha grupet palestineze për të menaxhuar Gazën në sektorë të ndryshëm”, tha ai.
Nazzal theksoi gjithashtu rëndësinë e rindërtimit të Gazës pas marrëveshjes së armëpushimit.
“Rindërtimi i Gazës është një prioritet dhe ne po punojmë drejt tij në koordinim me palë të ndryshme”, u shpreh ai.
