Grupi i rezistencës palestineze vuri në dukje mundësinë e një gabimi ose përzierjeje në lidhje me kufomat, duke iu përgjigjur pretendimeve izraelite në lidhje me kufomën e penges Shiri Bibas
Hamasi njoftoi se do të hetojë tërësisht pretendimet e Izraelit në lidhje me kufomën e penges izraelite Shiri Bibas, që u dorëzua dje, duke riafirmuar angazhimin e tij ndaj marrëveshjes së armëpushimit në Gaza, raporton Anadolu.
“Ne kemi pranuar pretendimet e Izraelit përmes ndërmjetësve tanë dhe do t’i shqyrtojmë ato me seriozitetin maksimal përpara se të shpallim qartë rezultatet”, tha Hamasi në një deklaratë.
Grupi i rezistencës palestineze vuri në dukje mundësinë e një gabimi ose përzierjeje në lidhje me kufomat, që mund të rezultojë nga bombardimet izraelite të vendit ku familja e penges Bibas ndodhej së bashku me palestinezët e tjerë.
Hamasi theksoi angazhimin e tij të plotë ndaj të gjitha marrëveshjeve, duke shtuar: “Ne e kemi demonstruar këtë përkushtim me sjelljen tonë në ditët e fundit. Ne nuk kemi asnjë interes të mbajmë asnjë kufomë”.
Grupi i rezistencës theksoi gjithashtu domosdoshmërinë e vazhdimit të zbatimit të plotë të dispozitave të marrëveshjes në të gjitha nivelet.
Hamasi shprehu gjithashtu habi për zhurmën e shkaktuar nga Izraeli pas pretendimeve të testit të ADN-së dhe hodhi poshtë kërcënimet e bëra nga kryeministri izraelit Benjamin Netanyahu.
Grupi besonte se “kërcënimet e Netanyahut kishin për qëllim të forconin imazhin e tij” mes mosmarrëveshjeve të brendshme politike izraelite.
Hamasi gjithashtu i bëri thirrje Izraelit të kthejë kufomën që pretendon se i përket një gruaje palestineze të vrarë gjatë sulmeve ajrore izraelite.
Më herët gjatë ditës, kryeministri izraelit Benjamin Netanyahu pretendoi se Hamasi shkeli kushtet e marrëveshjes së shkëmbimit të të burgosurve duke dorëzuar kufomën e një gruaje të paidentifikuar nga Gaza, në vend të kufomës së penges Shiri Bibas.
Hamasi dje njoftoi se kishte dorëzuar trupat e penges Bibas dhe dy fëmijëve të saj, Ariel dhe Kfir, si dhe Oded Lifshitz, sipas marrëveshjes së armëpushimit dhe shkëmbim të të burgosurve në Gaza.
Hamasi tha se robërit izraelitë u vranë në sulmet ajrore nga ushtria izraelite gjatë gjenocidit 15-mujor në enklavë.
