Sonte, skuadra e futbollit e Izraelit ka hapur turneun e futbollit në Lojërat Olimpike në Paris dhe himni i këtij vendi është sharë me zë të lartë para fillimit të ndeshjes me Malin.
Izraelitët, të cilëve Irani ka kërkuar zyrtarisht që t’u ndalohet pjesëmarrja në Lojërat Olimpike në Paris, hapen sonte me një ndeshje të kombëtares së futbollit kundër Malit, një vend që nuk e njeh Izraelin.
Organizatorët e Lojërave Olimpike kishin frikë nga mesazhet politike dhe trazirat në këtë lojë, dhe ajo filloi me fishkëllima të ashpra për himnin kombëtar të Izraelit. Përveç tifozëve të Malit, himnin e Izraelit kanë fishkëllyer edhe mysafirë dhe tifozë të shumtë nga Franca, mes tyre edhe një numër i madh marokenësh që kanë luajtur ndeshjen e tyre më herët gjatë ditës së sotme.
Edicioni i sivjetshëm i Lojërave Olimpike është mjaft i ngjyrosur politikisht për shkak të agresionit aktual ushtarak të Rusisë kundër Ukrainës, si dhe bombardimeve afatgjatë izraelite të Gazës.
Prandaj, ish-futbollisti profesionist dhe tani politologu Joles Boykoff i quajti Lojërat Olimpike në Paris “gjeopolitikisht më të stresuarat”.
Në të njëjtën ndeshje mes Malit dhe Izraelit, futbollistët u përshëndetën me mesazhin “Free Palestina”, shkruar nga tifozët në tribuna krahas flamujve palestinezë.
Ndërkohë, ministri i Brendshëm francez Gerald Darmanin tha se atletët izraelitë do të mbrohen gjatë gjithë kohës gjatë Lojërave, 52 vjet pas masakrës në Lojërat Olimpike të Mynihut, ku militantët palestinezë vranë 11 izraelitë.
“Në emër të Francës, dua t’i them delegacionit izraelit se ju mirëpresim në këto Lojëra Olimpike,” tha pardje ministri i Jashtëm Stephane Sejourne në një takim me kolegët e Bashkimit Evropian në Bruksel.
Megjithatë, për shkak të aksionit ushtarak izraelit në Rripin e Gazës që ka rezultuar në vdekjen e dhjetëra mijëra palestinezëve, deputeti i së majtës ekstreme Thomas Portes tha se atletët izraelitë nuk janë të mirëpritur në Francë.
