Inaugurohet ura e parë e autostradës, e cila lidh Rusinë dhe Kinën mbi lumin Amur dhe pritet të përmirësojë marrëdhëniet ekonomike mes dy vendeve.
Ndërtimi i kalimit 1.080 metra i gjatë në lumin Amur midis qytetit rus të Blagoveshchensk dhe qytetit kinez të Heihe filloi në fund të vitit 2016.
Edhe pse ndërtimi i urës, e cila kushtoi 19 miliardë rubla (328 milionë dollarë), përfundoi dy vjet më parë, ajo u hap vetëm së fundmi për shkak të epidemisë së llojit të ri të koronavirusit (Covid-19).
Aktualisht, vetëm kamionët lejohen të kalojnë kufirin, pasi rregullat strikte të Covid-19 janë ende në fuqi në Kinë.
Zëvendëskryeministri rus, Yury Trutnev, në ceremoninë e inaugurimit, tha: “Në botën e sotme të copëtuar, ura Blagoveshchensk-Heihe midis Rusisë dhe Kinës ka një kuptim të veçantë, simbolik. Kjo urë do të bëhet një linjë tjetër miqësie që lidh popujt e Rusisë dhe Kinës.”
Për kuptimin simbolik të ngjarjes foli edhe zëvendëskryeministri i Kinës, Hu Chunhua. Chunhua vuri në dukje se falë lidhjes, vendi i tij mund të ofrojë shërbime më të mira logjistike dhe kalimi do të bëhet një urë miqësie dhe bashkëpunimi.