Kosova po përballet me rritje të çmimeve thuajse të të gjitha produkteve, teksa norma e inflacionit ka arritur në 14.1%. Por ku është Kosova në të vërtetë në krahasim me vendet e rajonit si dhe me ekonomitë botërore? Gazeta Express iu sjell shifrat nga raportimet e fundit të të gjitha shteteve të publikuara në Tradingeconomics.
Sa i përket grupit të 20 ekonomive botërore më të fuqishme, G20, janë tri shtete, Turqia, Rusia dhe Argjentina, që kanë norma më të larta të inflacionit. Turqia ka normë shumë të lartë prej 78.62%.
Në Evropë ndërkohë, shtetet e rajonit si Maqedonia e Veriut, Bosnja e Hercegovina, Bullgaria dhe Rumania kanë norma më të larta të inflacionit ndërkohë që edhe shtetet tjera fqinje nuk qëndrojnë shumë më mirë. Vetëm Shqipëria ka normë gati dyfishtë më të ulët të inflacionit me 7.4%. sa i përket vendeve të Bashkimit Evropian, janë Estonia, Çekia, Polonia si dhe Bullgaria e Rumania të lartcekura që janë më keq se Kosova.
