Reshjet e dendura në të paktën 20 provinca kanë shkaktuar përmbytje masive në ditët e fundit
Numri i të vdekurve nga përmbytjet që kanë shkaktuar shkatërrime në të gjithë Iranin në ditët e fundit ka arritur në 56, sipas zyrtarëve, transmeton Anadolu Agency
Mehdi Valipur, kreu i operacioneve emergjente në Shoqërinë e Gjysmëhënës së Kuqe të Iranit, tha për mediat lokale sot se numri i viktimave u rrit teksa operacionet e kërkimit po intensifikohen.
Ai tha se përmbytjet e shkaktuara nga reshjet e mëdha të shiut gjatë javës së kaluar prekën 20 nga 31 provincat e vendit, duke përfshirë qindra qytete, qyteza dhe fshatra, ndërsa dëmtuan gjithashtu rrugët kryesore dhe autostradat.
Ndërsa raportimet për përmbytjet filluan të vijnë në fillim të javës së kaluar nga provincat jugperëndimore Fars dhe Sistan Baluchestan, rrëshqitjet e dheut dhe baltës të shkaktuara nga reshjet e dendura të shiut në lokalitetin malor Imamzadeh Davood në veriperëndim të Teheranit çuan në viktima të shumta të enjten.
Katastrofa vijoi të premten në Firuzkooh, një vendpushim popullor në ultësirat e maleve Alborz në verilindje të Teheranit, duke e bërë kryeqytetin provincën më të prekur.
Valipur tha se 18 vdekje janë raportuar nga Imamzadeh Davood dhe 14 nga Firuzkooh deri më tani, së bashku me të paktën 28 persona ende të zhdukur në të gjithë vendin.
Ndërkaq, guvernatori i Teheranit, Mohsen Mansuri, në një deklaratë tjetër tha se të paktën 11 persona janë konfirmuar të vdekur në Firuzkooh, ndërsa katër të tjerë janë zhdukur.
Imamzadeh Davood dhe Firuzkooh janë atraksione të njohura në mesin e udhëtarëve dhe alpinistëve, ku i pari është gjithashtu vendi i një tempulli të famshëm që është dëmtuar në masë të madhe nga përmbytjet e fundit.
Qytetet dhe qarqet fqinje të Teheranit, përfshirë Damavand dhe Rudehen, gjithashtu janë prekur rëndë nga përmbytjet, duke detyruar mijëra njerëz të lëshojnë shtëpitë e tyre.
Një përfaqësues i qarqeve Damavand dhe Firuzkooh në parlament tha se është e pamundur të vlerësohet numri i saktë i viktimave ose personave të zhdukur, duke thënë se numri i viktimave atje mund të jetë më i lartë se në Teheran.
Në provincën qendrore Yazd, rreth 650 kilometra në juglindje të Teheranit, të paktën gjashtë persona kanë vdekur deri më tani dhe dhjetë të tjerë janë lënduar në incidente të lidhura me përmbytjet, sipas zyrtarëve lokalë të emergjencës.
Një përfaqësues i provincës së njohur për historinë dhe trashëgiminë e saj të pasur, i tha parlamentit sot se përmbytjet katastrofike kanë shkaktuar dëme në shumë struktura historike.
Në provincën juglindore Kerman, të paktën tre vdekje kanë rezultuar nga përmbytjet, sipas zyrtarëve provincialë të menaxhimit të fatkeqësive, të cilët kanë raportuar gjithashtu dëme të mëdha në infrastrukturën e energjisë elektrike, ujit dhe telekomit, si dhe evakuimin e njerëzve në të paktën 34 fshatra.
Meteorologët kanë parashikuar më shumë reshje në ditët në vijim në qytete të ndryshme iraniane, ndërsa autoritetet u bëjnë thirrje njerëzve të shmangin udhëtimet në zonat e rrezikuara nga përmbytjet.
