Në një intervistë të parë pas inaugurimit të armikut kryesor të Iranit, Donald Trump, ministri i jashtëm iranian, Abbas Araghchi, deklaroi se Izraeli dhe SHBA-ja do të ishin “të çmendura” nëse do të sulmonin impiantet bërthamore të Iranit, duke shtuar se një sulm i tillë do të ishte një “katastrofë shumë e madhe” për rajonin.
Araghchi ftoi Sky News në Ministrinë e Punëve të Jashtme të Iranit për intervistë, duke e shfrytëzuar rastin për të komentuar mbi diskutimet për një sulm izraelit ndaj programit të dyshuar bërthamor të Iranit, me mbështetjen e SHBA-së.
“Kemi bërë të qartë se çdo sulm ndaj objekteve tona bërthamore do të marrë një përgjigje të menjëhershme dhe të vendosur. Por nuk besoj se ata do të bëjnë këtë gjë të çmendur. Kjo është me të vërtetë çmenduri dhe do ta kthente të gjithë rajonin në një katastrofë shumë të keqe,” tha Araghchi.
Gjatë mandatit të tij të parë, Trump tërhoqi mbështetjen e SHBA-së nga marrëveshja ndërkombëtare për programin bërthamor të Iranit, që kufizonte pasurimin e uraniumit në këmbim të heqjes së sanksioneve.
Irani këmbëngul se programi i tij bërthamor ka qëllime civile dhe paqësore. Megjithatë, që kur Trump u tërhoq nga marrëveshja, Irani rifilloi pasurimin e uraniumit në nivele që, sipas qeverive perëndimore, nuk kanë tjetër qëllim përveç ndërtimit të armëve bërthamore.
Araghchi deklaroi se, ndonëse është i gatshëm ta dëgjojë Trump-in, do të kërkohej shumë më tepër për ta bindur Iranin që të fillojë negociatat për një marrëveshje të re, duke marrë parasysh çfarë ndodhi me marrëveshjen e parë.
“Situata është ndryshe dhe shumë më e vështirë se herën e kaluar. Ka shumë gjëra që pala tjetër duhet të bëjë për të fituar besimin tonë… Nuk kemi dëgjuar asgjë përveç fjalëve ‘të bukura’, dhe kjo sigurisht që nuk mjafton,” tha ai.
“Dërgojini në Grenlandë”
Ministri i Jashtëm hodhi poshtë gjithashtu komentet më të fundit të Trump-it për Lindjen e Mesme. Propozimi i presidentit të rizgjedhur për të zhvendosur popullsinë palestineze nga Gaza shkaktoi zemërim në të gjithë rajonin.
Araghchi ironizoi me këtë ide duke dhënë një propozim të vetin: “Propozimi im është ndryshe. Në vend të palestinezëve, provoni të dëboni izraelitët, dërgojini ata në Grenlandë për të vrarë dy flutura me një goditje.”
Në mandatin e tij të shkurtër, Araghchi ka qenë dëshmitar i vrasjes dhe rrëzimit të aleatëve dhe miqve të Iranit nga pushteti.
Ai pranoi se aleatët e Iranit janë dobësuar, duke thënë: “Hamas dhe Hezbollah janë dëmtuar. Por në të njëjtën kohë, ata po rigjenerohen, sepse siç thashë, kjo është një shkollë mendimi, një ide, një qëllim, një ideal që gjithmonë do të ekzistojë.”
Qytetarët iranianë me të cilët u fol në rrugët e Teheranit shprehën shpresën se një marrëveshje mund të arrihej me Perëndimin, nëse kjo do të çonte në heqjen e sanksioneve dhe përmirësimin e situatës së vështirë ekonomike në Iran. Besimi midis Iranit dhe Amerikës është gjithashtu në nivelin më të ulët. Arritja e përparimit drejt çdo marrëveshjeje dhe heqjes së sanksioneve do të jetë jashtëzakonisht sfiduese.
