Islamic Relief në Kosovë shpërndan 50 mijë € për bizneset e reja, përfitojnë nëntë të rinj

Dega e Islamic Relief në Kosovë në kuadër të projektit të edukimit dhe ndërmarrësisë në një ceremoni ka bërë shpërndarjen e granteve në vlerë prej 50 mijë euro, raporton Ekonomia Online.  Nga kjo përkrahje kanë përfituar nëntë të rinj e të reja për fillimin e bizneseve të tyre.

Jetmira Zeka, koordinatore e projekteve ka sqaruar se fillimisht kanë aplikuar 100 persona, nga të cilët 28 janë trajnuar për 2 muaj rresht nga ekspertë të fushës, e më pas janë përzgjedhur nëntë më të suksesshmit, të cilët edhe kanë përfituar grante.

Drejtori i Organizatës Islamic Relief në Kosovë, Mohamed Soliman, tha se do të vazhdojnë të përkrahin të rinjtë në hapjen e bizneseve të reja.

Madje ai u shpreh se kanë hasur në ide shumë interesantë nga të rinjtë për bizneset e tyre.

“Ju faleminderit që jeni me ne në këtë ditë të rëndësishme për shpërndarjen e këtyre grandeve për përfituesit, do të vazhdojmë më përkrahje”.

“Jam shumë i lumtur që po shpërndajmë këto grande në kuadër të programit për edukim dhe ndërmarrësi në përkrahje të të rinjve për hapjen e bizneseve të reja”.

“Dua të iu përgëzojë ngase ka pasur ide, shumë ide të mira e interesante dhe kemi përzgjedhur më të mirat. Dua të falënderoj dhe përgëzoj përfituesit dhe u them që duhet të vazhdojnë”.

Albulena Gashi-Hajrullahu, menaxhere e programeve për Kosovë dhe Shqipëri, tha se është shumë e rëndësishme që të rinjtë përfitues të vazhdojnë me zhvillimin e bizneseve të tyre.

“Sot po celebrojmë eventin për shpërndarjen e granteve. Për ne është me rëndësi që secili prej jush me vazhduar idetë e juaja”.

“Dua me i’u pa tu u rrit sa më shumë dhe suksese tutje dhe me pa edhe punëtorë shtesë në bizneset e juaj. Ne kemi me vazhduar me ide të tilla me përkrahë rininë tonë”.

Kryetari i Mitrovicës së jugut, Bedri Hamza, komunë kjo që kanë përifuar tre persona, tha se Islamic Relief në Kosovë ka një staf të mrekullueshëm dhe bëjnë një punë të jashtëzakonshme duke i përkrahur në arsim e fusha të tjera.

Ai më tej ka sqaruar se kanë nënshkruar memorandum që kalon vlerën e 300 mijë eurove.

“Ndihem i nderuar që jam bashkë me juve. Ne ekonomi nuk ka kurgjo falë. Nëse merr diçka falë kjo dikujt i kushton. Ky kontribut është ka domethënie të madhe siç është ndërmarrësia. Islamic ka një staf të mrekullueshëm që bëjnë një punë të jashtëzakonshme”.

“Islamic vazhdon të kontribuojë në fushën e arsimit. Vazhdimisht ka përkrahur edhe shëndetësinë. Qëllimi është t’i adresojmë sfidat e ekonomisë siç është defici i lartë tregtar. Investimet në këto fusha janë që të zëvendësohen importet”.

“Ne kemi nënshkruar memorandum që ka kalon vlerën e 300 mijë eurove. A ka ma mirë t’i shoh këta të rinj e të reja me ide, por që iu mungon financimi”.

Edhe Ferit Idrizi, kryetari i Vushtrrisë, falënderoi Islamic Relief në Kosovë për përkrahen në fushën e shëndetësisë, raporton EO.

Ai foli për marrëveshjet e nënshkruara duke përmendur ndërtimin e një tregu për prodhuesit që ka vlerën 600 mijë euro si dhe subvencionimin e 200 serrave që kap vlerën e 300 mijë eurove.

“Përvojat tona të bashkëpunimit janë të shkëlqyeshme dhe shumë të afërta me drejtorin Soliman. Kemi bashkëpunim në fushën e shëndetësisë”.

“Para disa muajsh kemi nënshkruar marrëveshje të bashkëfinancimit për ndërtimin e një tregu për prodhuesit vendor që ka vlerën 600 mijë euro. Projekt tjetër që keni nënshkruar është në fushën e bujqësisë për subvencionimin e 200 serrave që kap vlerën 300 mijë euro”.

Islamic Relief Worldëide (IRW) është organizatë ndërkombëtare humanitare e themeluar më 1984 në Birmingham të Britanisë së Madhe, ku edhe e ka qendrën kryesore.

Organizata është prezentë në rreth 45 vende të botës, e po ashtu operon me zyrën e saj edhe në Kosovë që nga viti 1999, duke qenë një nga organizatat e para të cilat depërtuan për ta ndihmuar, rindërtuar dhe zhvilluar vendin.

Në Kosovë, Islamic Relief ka implementuar projekte të natyrave emergjente, shëndetësore, edukative, infrastrukturore, etj., duke u përqendruar më shumë në ndihmesën e familjeve skamnore, atyre me jetimë, familjeve nën asistencë sociale si dhe familjeve me fermerë për të zhvilluar mirëqenien ekonomike.

Kategoritë
LajmeVendi