Mediat italiane kanë zbuluar prapaskenat e shkarkimit të Thiago Mottas nga pankina e Juventusit, ndonëse ai kishte kontratë të vlefshme deri në vitin 2027.
Trajneri 42-vjeçar nuk arriti të përmbushte pritshmëritë e drejtuesve dhe tifozëve të klubit torinez: Juventus ndodhet në vendin e pestë në Serie A, është eliminuar nga PSV në Ligën e Kampionëve dhe nga Empoli në Kupën e Italisë.
Igor Tudor do të marrë drejtimin e ekipit deri në fund të sezonit, me mundësi zgjatjeje të kontratës deri në qershor 2026.
Sipas Gazzetta dello Sport, e ardhmja e Mottas në stolin e Juventusit u vendos në dyshim pas një takimi të tensionuar me drejtorin Cristiano Giuntoli, ku u diskutua për humbjet kundër Atalantës dhe Fiorentinës.
Giuntoli e kritikoi trajnerin për stilin e lojës që nuk u pëlqye tifozëve dhe që çoi në shumë barazime, duke larguar Juventusin nga kreu i tabelës. Takimi përfundoi me një debat të ashpër, ku Giuntoli thuhet se i tha Mottas: “Më vjen turp që të kam zgjedhur si trajner të Juventusit.”
Fillimisht nuk ishte planifikuar shkarkimi i Mottas, por pas këtij përplasjeje, u vendos që ai të largohet nga drejtimi i ekipit.
