Xhamia do të qëndrojë e mbyllur për 4 ditë për të lejuar kolonët e paligjshëm të festojnë festat Sukkot dhe Yom Kippur.
Autoritetet izraelite mbyllën Xhaminë Ibrahimi në qytetin Hebron (El-Halil) të Bregut Perëndimor të pushtuar për muslimanët palestinezë sot për 4 ditë për të lejuar kolonët e paligjshëm të festojnë dy festa hebreje, raporton Anadolu.
“Autoritetet okupuese izraelite mbyllën xhaminë të mërkurën për të festuar festat Sukkot dhe Yom Kippur”, tha për Anadolu drejtori i Xhamisë Ibrahimi, Moataz Abu Sneineh.
Ai tha se objekti, megjithatë, do të jetë i hapur për kolonët izraelitë për të kryer rituale talmudike dhe për të organizuar festime. “Xhamia do të qëndrojë e mbyllur (për besimtarët palestinezë) deri të shtunën në mbrëmje”, shtoi ai.
Kolonët do të shënojnë Yom Kippurin, ditën më të shenjtë në kalendarin hebre, që nga mbrëmja e së enjtes.
Xhamia Ibrahimi, e vendosur në qytetin e vjetër të Hebronit, është nën kontrollin e Izraelit, ndërsa qindra kolonë të paligjshëm jetojnë në zonë, të ruajtur nga ushtarë izraelitë.
Që nga viti 1994, pas një masakre nga një kolon i paligjshëm që rezultoi në vrasjen e 29 besimtarëve palestinezë, Izraeli e ka ndarë xhaminë, duke ndarë 63 për qind të hapësirës për besimtarët hebrenj dhe 37 për qind për muslimanët.
Tensionet kanë qenë të larta në gjithë Bregun Perëndimor të pushtuar në mes të ofensivës brutale izraelite në Rripin e Gazës, e cila u ka marrë jetën rreth 42 mijë palestinezëve, kryesisht gra dhe fëmijë, që nga 7 tetori i vitit të kaluar.
Sipas burimeve palestineze, të paktën 745 palestinezë janë vrarë dhe rreth 6.200 janë plagosur në Bregun Perëndimor të pushtuar gjatë së njëjtës periudhë.
Situata vazhdon të përshkallëzohet pavarësisht një opinioni historik nga Gjykata Ndërkombëtare e Drejtësisë (GJND) më 19 korrik, e cila shpalli të paligjshëm pushtimin disadekadësh të tokës palestineze nga Izraeli dhe bëri thirrje për evakuimin e të gjitha vendbanimeve në Bregun Perëndimor dhe Kudsin Lindor.
