Për të tretën ditë radhazi, ushtria izraelite vazhdoi operacionet e saj ushtarake në Khan Younis, mes bombardimeve me artileri, të shtëna me armë dhe prishjes së ndërtesave të banimit.
Pesë palestinezë u vranë dhe disa të tjerë u plagosën sot në një sulm ajror izraelit mbi tendat që strehonin njerëz të zhvendosur në Khan Younis në jug të Rripit të Gazës, transmeton Anadolu.
Sulmi kishte në shënjestër tendat e refugjatëve në zonën e banimit Hamad në veri të Khan Younisit, thanë dëshmitarët.
Për të tretën ditë radhazi, ushtria izraelite vazhdoi operacionet e saj ushtarake në Khan Younis, mes bombardimeve me artileri, të shtëna me armë dhe prishjes së ndërtesave të banimit.
Ushtria nisi një sulm të befasishëm në qytet pasi lëshoi urdhra të menjëhershëm evakuimi për banorët në lagjet e tij lindore, të cilat më parë ishin përcaktuar nga Tel Avivi si “zonë e sigurt” për civilët e zhvendosur.
Të paktën 129 palestinezë janë vrarë dhe mbi 400 të tjerë janë plagosur në ofensivën e izraelite në qytet, sipas autoriteteve lokale.
Duke shpërfillur një rezolutë të Këshillit të Sigurimit të OKB-së që kërkon armëpushim të menjëhershëm, Izraeli ka vazhduar ofensivën e tij brutale në Gaza që nga sulmi i 7 tetorit nga Hamasi.
Më shumë se 39.100 palestinezë janë vrarë që atëherë, kryesisht gra dhe fëmijë, dhe mbi 90.200 janë plagosur, sipas autoriteteve lokale shëndetësore.
Mbi nëntë muaj pas fillmit të sulmeve izraelite, pjesë të mëdha të Gazës qëndrojnë në gërmadha, krahas një bllokade paralizuese të ushqimit, ujit të pastër dhe ilaçeve.
Izraeli akuzohet për gjenocid në Gjykatën Ndërkombëtare të Drejtësisë, e cila në vendimin e saj të fundit urdhëroi Tel Avivin të ndalojë menjëherë operacionin e tij ushtarak në qytetin jugor Rafah, ku më shumë se 1 milion palestinezë kishin kërkuar strehim nga lufta përpara se të pushtohej më 6 maj.
