Pas publikimit të informacioneve nga gazeta amerikane New York Times lidhur me mënyrën se si Donald Trump e kishte penguar Izraelin që të planifikonte një sulm ndaj Iranit në maj, reagimet nga zyrtarët izraelitë nuk po ndalen.
Sipas New York Times, Donald Trump gjatë një takimi me Benjamin Netanyahun në Shtëpinë e Bardhë kishte arritur ta bindë atë që të heqë dorë nga një sulm që Tel Avivi kishte planifikuar për muajin maj.
Ky informacion u publikua nga ky medium, ndërsa njëri nga zyrtarët izraelitë deklaroi për Jerusalem Post se kjo përfaqëson një nga rrjedhjet më të rrezikshme të informacioneve në kontekstin e Izraelit.
Qëllime të rrezikshme
Izraelitët kishin planifikuar të sulmonin Iranin në maj, por Trump i ndali për shkak të mbajtjes së negociatave.
Donald Trump foli për këtë temë edhe në një konferencë për shtyp pas takimit me kryeministren italiane Giorgia Meloni dhe deklaroi se Netanyahu nuk kishte refuzuar sulmin, por kishte thënë se nuk kishte ngut.
“Irani ka një mundësi të bëhet një vend i madh dhe të jetojë pa viktima të mëtejshme. Netanyahu i quajti negociatat si opsionin e parë dhe tha se nëse ekziston një opsion tjetër, ai mendon se do të ishte i keq për Iranin”, tha Trump duke përcjellë fjalët e kryeministrit izraelit.
Reagimi ndaj pretendimeve të NYT-së
Nga kabineti i Netanyahut u deklarua: “Kemi ndërmarrë pafund aksione sekrete dhe publike, Irani nuk do të ketë armë bërthamore”
Më herët, kabineti i Netanyahut u deklarua duke thënë se kryeministri izraelit po bën gjithçka për të penguar zhvillimin e mëtejshëm të programit bërthamor iranian.
“Netanyahu ka udhëhequr pafund aksione sekrete dhe të hapura në fushatën kundër programit bërthamor të Iranit. Vetëm falë këtyre aksioneve, Irani sot nuk ka një arsenal bërthamor. Këto aksione e kanë vonuar programin bërthamor iranian për afërsisht një dekadë, falë këmbënguljes së kryeministrit për t’i rezistuar opozitës së brendshme dhe të jashtme ndaj politikës së tij të vendosur kundër Iranit. Siç ka thënë kryeministri shumë herë – Izraeli nuk do ta lejojë Iranin të ketë armë bërthamore,” thuhet në deklaratën nga kabineti.
