Një nga boksierët më të mëdhenj në histori, kampion olimpik dhe dy herë kampion bote në kategorinë e rëndë, George Foreman, ka ndërruar jetë në moshën 76-vjeçare.
Pas vetes la 12 fëmijë nga pesë martesa. Familja e tij nuk ka bërë të ditur shkakun e vdekjes.
“Zemrat tona janë të thyera. Me shumë pikëllim njoftojmë se ka ndërruar jetë i dashuri ynë George Foreman Sr. U largua në paqe, i rrethuar nga të dashurit e tij. Humanist, olimpist dhe dy herë kampion bote në peshën e rëndë, ishte një njeri i nderuar. I njohur si njeri i mirë, i disiplinuar dhe i vendosur. E ruajti trashëgiminë e tij dhe luftoi pareshtur për të mbrojtur emrin dhe familjen e vet,” njoftoi familja përmes Instagramit.
Foreman u bë i famshëm me fitimin e medaljes së artë në Lojërat Olimpike të vitit 1968, dhe festimi i fitores me flamurin amerikan në Meksikë është një nga skenat historike të sportit.
Më pas kaloi në boksin profesionist dhe në vitin 1973, me fitoren kundër favoritit Joe Frazier në Xhamajka, u bë për herë të parë kampion bote në kategorinë e rëndë.
E mbrojti titullin dy herë, por më pas humbi nga Muhammad Ali në duelin legjendar të njohur si “Rumble in the Jungle” që u zhvillua në Kongo.
Ai u rikthye në majë në vitin 1994, kur në moshën 45-vjeçare mposhti Michael Moorer-in dhe u shpall kampion për herë të dytë, duke u bërë boksieri më i moshuar që ka fituar titullin botëror në historinë e boksit.
Përveç karrierës sportive, Foreman ishte i njohur edhe si predikues fetar dhe fitoi qindra miliona dollarë nga shitja e grilës elektrike që mbante emrin e tij – “George Foreman Grill”.
