Ka ndërruar jetë një nga heronjtë më të mëdhenj të futbollit anglez, pjesëtar i të vetmit brez të artë

Publiku i futbollit anglez u trondit nga lajmi i vdekjes së George Cohen, mbrojtësit të djathtë legjendar që fitoi titullin kampion bote në vitin 1966.

Cohen ka vdekur në moshën 83-vjeçare, ka konfirmuar klubi i tij Fulham. Është klubi ku ai kaloi gjithë karrierën e tij dhe nga i cili nuk donte kurrë të largohej pavarësisht ofertave të shumta.

Interesant është fakti se ai ka lindur më pak se një milje larg nga Craven Cottage, stadiumi i Fulham ku kaloi gjithë karrierën e tij futbollistike.

Skuadra e futbollit të Anglisë fitoi vetëm një titull kampion bote dhe në atë ndeshje kundër Gjermanisë Perëndimore në vitin 1966, Cohen luajti si titullar në mbrojtje të djathtë.

Ai luajti 37 ndeshje për kombëtaren e Anglisë. Vdekja e tij tronditi të gjithë në futbollin anglez dhe legjendari Geoff Hurst, heroi i Anglisë që shënoi një hat-trick në finalen e Kupës së Botës, i tha gjithashtu lamtumirën Cohen.
Hurst tha se ishte i pikëlluar nga largimi i mikut dhe shokut të tij të madh.

Kategoritë
Sport