“Kërcënimet vazhdojnë. I gjithë populli palestinez është i rrezikuar… Nuk ka pensionim në këtë luftë deri në fund. Lufta jonë vazhdon”, tha Karim Younis, palestinezi i cili kaloi 40 vite në burgjet izraelite.
Karim Younis është një palestinez i cili kaloi 40 vite në burgjet izraelite, dhe u lirua disa ditë më parë, ndërsa nuk mund të përshkruajë me fjalë emocionet që ndien pasi është përsëri një njeri i lirë.
Karim Younis, nga qyteti Ara në veri të Izraelit, u arrestua më 6 janar 1983 dhe u dënua me vdekje, më pas dënimi i tij u kthye në burgim të përjetshëm dhe përfundimisht iu kthye në 40 vite burg.
Si një student 26-vjeçar, ai në atë kohë u akuzua se ishte anëtar i lëvizjes së ndaluar Fatah dhe për posedim të armëve dhe vrasjen e një ushtari izraelit.
Gjatë paraburgimit, ai shkroi dy libra në arabisht, një në vitin 1990 me titullin “Realiteti politik në Izrael”, dhe tjetri në vitin 1993 me titullin “Lufta ideologjike dhe zgjidhja”.
Ai doli nga burgu më 5 janar dhe në një intervistë për Anadolu Agency (AA), ai tregoi se edhe gjatë lirimit kishte përjetuar shqetësime të mëdha nga gardianët izraelitë dhe forcat e sigurisë.
“Ata lirimin tim e kthyen në një lloj operacioni ushtarak. Ditën që u lirova, sikur kishin zbarkuar dhe më kërkuan të largohesha urgjentisht nga kompleksi. Përndryshe, të burgosurit e liruar dalin normalisht te porta, por më morën me një automjet duke devijuar nga rruga kryesore dhe më çuan në një vend që nuk e njihja. Më zbritën dhe më dhanë një biletë autobusi. Më treguan rrugën për në stacionin e autobusëve, pa më dhënë sendet e mia personale dhe më thanë të shkoja vetë në shtëpi. Ishte errësirë, shkova në stacionin e autobusit dhe aty pashë disa punëtorë palestinezë. Kërkova të më japin një celular. Kur u prezantova, ata u treguan shumë të përzemërt me mua, u mblodhën dhe më ofruan ushqim dhe pije. Telefonova familjen time dhe ata erdhën të më merrnin brenda gjysmë ore”, tha Younis.
Duke theksuar se e ka të vështirë të përshkruajë se si është ndierë pas daljes nga burgu, Younis tha se është një emocion i veçantë të rikthehesh në një botë që është ndryshe nga ajo që ke lënë.
“Po mundohem të shijoj lirinë time. Mund të shkosh ku të duash dhe kur të duash, mund të bësh çfarë të duash, mund të ecësh pa pranga. Këto janë ndjenja që nuk i kam përjetuar për 40 vjet. Pemë dhe bar i gjelbër. Nuk e kam parë këtë për 40 vjet. Vetëm grila, dyer, mure betoni, tela me gjemba… Kjo ishte gjithçka që ishim mësuar të shihnim. Madje edhe ecja në asfalt ishte interesante për mua”, tha Younis.
– “Qeveria e re izraelite është ndoshta më radikale në historinë e Izraelit”
Palestinezi i cili kaloi pandërprerë kohën më të gjatë në burgjet izraelite tha se tani ka takuar brezin e tërë të të afërmve që nuk ka mundur t’i takonte për shkak të kufizimeve izraelite gjatë burgimit.
Ai tha se mijëra njerëz e kanë vizituar atë deri më tani, duke theksuar se ka takuar për herë të parë edhe familjet e vëllezërve të tij që u martuan në kohën kur ai ishte në burg, ku vetëm të afërmit më të ngushtë kishin të drejtë ta vizitonin.
Duke theksuar se populli palestinez me dekada lufton kundër dhunës dhe kërcënimeve të Izraelit si persekutimi, hebraizimi, dëbimi dhe spastrimi etnik, Younis tha se qeveria e re izraelite është ndoshta më radikale dhe me tiparet më të larta të fashizmit në historinë e Izraelit.
“Kërcënimet vazhdojnë. Nuk jam i vetmi që kërcënohem. I gjithë populli palestinez është nën kërcënim”, theksoi Younis.
“Më shumë se shtatë milionë palestinezë i kanë qëndruar besnikë identitetit të tyre dhe mbeten në tokën e tyre midis Mesdheut dhe lumit Jordan. Palestinezët po luftojnë për të rifituar të drejtën e tyre për vetëvendosje dhe për të krijuar një shtet palestinez me Kudsin si kryeqytet”, tha Younis.
Younis më tej tha se ministri aktual izraelit i Sigurisë Kombëtare, Itamar Ben-Gvir, e ka kërcënuar me dëbim dhe shtoi se Ben-Gvir ushtron presion edhe ndaj të burgosurve të tjerë palestinezë.
“Në fakt, kjo qeveri është qeveria më ekstreme ndonjëherë. Këta njerëz erdhën në pushtet dhe u bënë ministra. Simboli më i madh i kësaj është emërimi i ekstremistit Itamar Ben-Gvir si ministër i Sigurisë Kombëtare. Kjo ministri menaxhon edhe burgjet që janë bërë më politike. Të burgosurit palestinezë i presin ditë më të vështira në të ardhmen”, tha Younis dhe sqaroi se Ben-Gvir ka kërcënuar heqje të të drejtave të burgosurve, t’i kthente në vitet shtatëdhjetë dhe të lejonte vetëm një orë në rrezet e diellit në ditë.
Duke paralajmëruar se palestinezët e burgosur do të vazhdojnë të luftojnë për qëndrimin e tyre dhe identitetin e nderuar, Younis tha se ai është një nga këta palestinezë.
“Unë do të bëj më të mirën për këtë kauzë. Nuk ka pensionim në këtë luftë deri në fund. Lufta jonë vazhdon”, tha Younis.
