Në distriktin Schleswig-Flensburg të landit gjerman Schleswig-Holstein, të premten u përjetua një kaos i vërtetë dimëror në rrugët kryesore. Për shkak të sasive të mëdha të borës dhe akullit, autostrada A7 ishte pjesërisht e ngrirë.
Si pasojë, trafiku në drejtim të veriut u ndal disa herë, raportuan mediat gjermane.
Probleme për shoferët pati edhe në rrugët lokale të Schleswig-Holstein, ku rrugët ishin të mbuluara nga akulli, duke e bërë qarkullimin shumë të vështirë.
Aksidentet e para në trafik
Ndërkohë, reshjet e para të borës dhe kushtet e rrëshqitshme çuan në disa aksidente trafiku në rrugët e veriut të Gjermanisë.
Sipas informacioneve të policisë, gjatë ditës ndodhën katër incidente – kamionë dhe autobusë që rrëshqitën dhe mbetën të bllokuar në distriktet Segeberg, Ostholstein dhe Schleswig-Flensburg, raporton Fenix Magazin.
Pas mbylljeve të shkurtra, rrugët u hapën shpejt. Fatmirësisht, nuk pati të lënduar.
Paralajmërimet ende në fuqi
Sipas informacioneve të policisë, operacionet e hedhjes së kripës në rrugë po zhvillohen sipas planit, dhe të gjitha automjetet e shërbimit dimëror janë në gatishmëri të vazhdueshme, në varësi të kushteve të motit.
Edhe nëse temperaturat pritet të rriten të dielën, siç parashikon Shërbimi Meteorologjik Gjerman (DWD), policia paralajmëroi për rrugë të rrëshqitshme deri atëherë.
Pavarësisht përpjekjeve për të hedhur kripë në rrugë, situata mbetet kritike dhe shoferët duhet të vazhdojnë të jenë të kujdesshëm.
Shoferët në veri këshillohen për kujdes të shtuar edhe nga zyra e shtypit të Qendrës së Trafikut Verior. Veçanërisht, nuk duhet të parakalohen automjetet që shpërndajnë kripë në rrugë, pasi rrugët përpara tyre janë ende të rrëshqitshme, raportojnë mediat gjermane.
